அன்னய்யா ஞாபகமிருக்கா.. "கூட்டத்தை கண்டு ஏமாறாதீங்க விஜய்.. "ராஜாவின் பார்வையிலே" நடிகையால் பரபரப்பு

Updated: Tuesday, January 21, 2025, 20:17 [IST]

Subscribe to Oneindia Tamil

சென்னை: முழு நேர அரசியலுக்கு வரவுள்ள நடிகர் விஜய்க்கு முக்கிய அட்வைஸ் ஒன்றை, தமிழ் மற்றும் தெலுங்கு பட பிரபல நடிகை இந்திரஜா தந்துள்ளார்.. அத்துடன் ஆந்திர அரசியல் குறித்தும் சில தகவல்களை பகிர்ந்து கொண்டுள்ளார் இந்திரஜா.

ராஜாவின் பார்வையிலே என்ற படம்தான், அஜித், விஜய் இருவரும் ஒன்று சேர்ந்து நடித்த ஒரே படமாகும். இதில், விஜய்க்கு ஜோடியாக நடித்திருந்தார் இந்திரஜா. இதற்கு பிறகு எங்கள் அண்ணா படத்தில் மட்டும் நீண்ட வருடங்களுக்கு பிறகு நடித்திருந்தார்.

Aval vikatan யூடியூப் சேனலுக்கு பேட்டி தந்துள்ளார்.. அதில், தன்னுடைய சினிமா பயணம் குறித்த ஏராளமான தகவல்களை பகிர்ந்து கொண்டுள்ளார்.. அப்போது, முழுநேரமாக விஜய் அரசியலுக்குள் வந்துள்ளது பற்றி என்ன நினைக்கிறீர்கள்? அவருக்கு என்ன சொல்ல நினைக்கிறீர்கள் என்பது குறித்து கேள்வி எழுப்பப்பட்டது.

பிரஜை: அதற்கு அவர், "விஜய்க்கு வாழ்த்துக்கள்.. கண்டிப்பாக பெரிய மாற்றத்தை விஜய் சாரிடம் மக்கள் எதிர்பார்க்கிறார்கள்.. நிறைய நம்பிக்கையையும் வைத்திருக்கிறார்கள். சக நடிகையாக இல்லாமல் சாதாரண பிரஜையாக ஒரு விஷயத்தை மட்டும் அவருக்கு சொல்லணும்னு நினைக்கிறேன்.

"கூட்டத்தை பார்த்து மட்டும் நம்பிடாதீங்க.. அந்த கூட்டத்தை எப்படி ஓட்டாக மாற்ற வேண்டும் என்பதற்கு சரியான வழிநடத்தக்கூடியவர் விஜய்க்கு தேவை. ஏனென்றால், சேரும் கூட்டம் எல்லாமே வாக்குகளாக மாறும் என்பது நிச்சயமில்லை. சிரஞ்சீவி சார், பவன் கல்யாண சார், இவங்கெல்லாம் கட்சி ஆரம்பிக்கும்போது, நான் பக்கத்தில் இருந்து பார்த்திருக்கிறேன்... எனவே ரசிகர் கூட்டத்தை வாக்குகளாக மாற்றுவது ஒரு பெரிய விளையாட்டு.

அண்ணையா: அதுக்காக இவர்களை எல்லாம் மக்கள் மதிக்கவில்லை என்று அர்த்தம் இல்லை.. நிறைய மரியாதை, அன்பு, பாசம், அபிமானம் வைத்திருக்கிறார்கள்.. சிரஞ்சீவியை அண்ணையான்னுதான் கூப்பிடுவாங்க.. பவன் கல்யாணை, பவர் ஸ்டாருன்னுதான் கூப்பிடுவாங்க. தங்கள் வீட்டு பிள்ளையாகவே இவர்களை பாவிக்கிறார்கள்.. ஆனாலும், அரசியல் களம் வேறு மாதிரியானது.. அங்கே போடும் கணக்குகள் வேறுவகையானது.

சினிமாவில் ஒரு படம் ஓடலேன்னா அது தோல்வி, ஓடினால் அது வெற்றி என்பதுபோல அரசியலை அணுக முடியாது.. நீங்க எதிர்பார்க்கிற மாதிரி நடக்காவிட்டால், அது தோல்வி என்று முடிவு செய்ய கூடாது. அரசியலில் தோற்கும்போது நிறைய லாபம் கிடைக்கும்.. ஜெயிக்கும்போது நிறைய இழக்க வேண்டியிருக்கும். இது இரண்டிற்குமே நீங்க தயாராக இருக்கணும்.

தேவைப்படாது: விஜய் நல்ல மனசுக்காரர்.. மக்களுக்காக சிந்திக்கக்கூடிய நபர்தான். அதனால் விஜய்யை சரியான முறையில் வழிநடத்தக்கூடியவர்கள் மட்டுமே இப்போதைக்கு தேவை.. வேற எதுவுமே அவருக்கு தேவைப்படாது" என்றெல்லாம் கூறியிருக்கிறார்.