ரூ.5 லட்சம் போச்சே.. குமரிமுத்து சொன்ன வார்த்தை.. அவரால் மட்டுமே அது சாத்தியம்: நெகிழ்ந்த வி. சேகர்

Updated: Wednesday, January 15, 2025, 20:15 [IST]

Subscribe to Oneindia Tamil

சென்னை: யாரையுமே திட்டாமல் மேடையில் ஒருவரால் பேச முடியும் என்றால் அது குமரிமுத்துவால் மட்டுமே சாத்தியம் என்று பாராட்டி சொல்லி உள்ளார் பிரபல டைரக்டர் வி.சேகர். தனக்கும், குமரிமுத்துவுக்குமான தொடர்பு பற்றியும் விவரித்து சொல்லி உள்ளார் வி.சேகர்.

IndiaGlitz யூடியூப் சேனலுக்கு, டைரக்டர் வி.சேகர் பேட்டி ஒன்றை தந்துள்ளார்.. அதில் சிவாஜி, மனோரமா உள்ளிட்டவர்களை பற்றியெல்லாம் கேள்வி எழுப்பப்பட்டது. அதற்கெல்லாம் பதிலளித்துள்ள வி.சேகர், சிவகார்த்திகேயன், மறைந்த பழம்பெரும் நடிகர் குமரிமுத்து பற்றியும் கூறியிருக்கிறார்.

"நான் தீவிரமான முருகன் பக்தர்.. என்னுடைய 15 படமும் பழனி கோயில் படிக்கட்டில் உட்கார்ந்துதான் எழுதியிருக்கிறேன்.. வருத்தப்படாத வாலிபர் சங்கம் இந்த பழனியில் அப்போதிருந்தே இருக்கு,.. ஆண்டுதோறும் இந்த விழாவில் நான் சிறப்பு அழைப்பாளராக கலந்து கொள்வேன்.. இந்த பெயரைதான் சிவகார்த்திகேயன் படத்துக்கு வெச்சாங்க.

சிவகார்த்திகேயன்: நான் அடுத்து ஒரு படம் எடுத்தால், அதில் சிவகார்த்திகேயனை நடிக்க வைக்கலாம் என்று நினைக்கிறேன்.. காரணம், அந்த வட்டாரத்தை சேர்ந்தவர், நல்லா நடிக்கிறார்.. ஆனால், அதுக்குள்ள சிவகார்த்திகேயன் வேற லெவலுக்கு போயிட்டாரு. எனக்கும் பல பிரச்சனைகள், சிக்கல்கள் வந்துவிட்டன.

குமரிமுத்துவை பொறுத்தவரை, தனிப்பட்ட முறையில் ஒரு பெஸ்ட் மனிதர். அவரும் டிராமா ஆர்டிஸ்ட். ரொம்ப பாலிடிக்ஸ் இல்லாத மனிதர்.. யதார்த்தமா இருக்காருன்னு அவரை பல படங்கள்ல நடிக்க வச்சேன். ஒரு தடவை பொண்டாட்டி சொன்னா கேட்டுக்கணும் படத்துல, மலேசியாவுல ஒரு புரோக்கிராமுக்காக 2 நாள் பர்மிஷன் வாங்கிட்டு போனாரு. ரொம்ப நாள் முன்னாடி பிளான் இது.. பிளைட் டிக்கெட்டும் முன்னாடியே போட்டாச்சுன்னு சொன்னார். நானும் சரின்னுட்டேன்..

கிளைமேக்ஸ்: நான் பட்ஜெட்ல படம் எடுக்குறவன். அதுக்கு அப்புறம் பார்த்தா இவர் வரல.. முக்கியமான கிளைமாக்ஸ் சீனில் இவர் இருக்கணும். அங்க அவரோட பாஸ்போர்ட்டை மிஸ் பண்ணிட்டாரு. அவரு வராததால, அவருடன் நடிக்க வேண்டிய காம்பினேஷன் எல்லாமே நின்னுடுச்சு.. உடனே மழை சீசனும் வந்துருச்சு. இதனால் எங்களுக்கு 5 லட்சம் லாஸ் ஆயிடுச்சு.

அதுக்கப்பறம் என்னிட்ட ஓடிவந்து, "பாஸ்போர்ட் மிஸ் ஆச்சு, என்னால உடனே வர முடியல... சூழ்நிலை அந்த மாதிரி ஆகிப்போச்சு"ன்னு சொன்னாரு.. இதுக்காக ரொம்ப வருத்தப்பட்டார். அதுக்கு அப்புறம் அவர் என்னிடம், "உங்க படத்துல நான் இருக்கணும். நீங்க என்ன கொடுத்தாலும் சரிதான். ஏன்னா நான் லாஸ் பண்ணிட்டேனே"ன்னு சொன்னார்.

முக்கியமான நபர்: அப்போதிருந்து பெரும்பாலும் எல்லா படத்துலயும் அவருக்கு வாய்ப்பு கொடுப்பேன். எவ்வளவு நாள் டேட்களையும் தருவாரு.. ரொம்ப நல்ல மனிதர்.. யாரையுமே திட்டாமல் மேடையில் போய் பேசுவாரு.. திமுகவுலயே இருந்தாரு. ஆனா எதிர்க்கட்சியைக் கேவலமா திட்ட மாட்டாரு. திட்டாமல் பேசுவதில் மிக முக்கியமான நபர்.. இது அவரால மட்டும்தான் முடியும்' என்றெல்லாம் நெகிழ்ந்து பேசியிருக்கிறார் வி.சேகர்.