Robo Shankar: நான் பல எலிமினேஷன் பார்த்து வந்தவன்! கடைசியாக ரோபோ சங்கர் சொன்ன விஷயம்.. கண்ணீரில் குடும்பம்

Published: Thursday, September 18, 2025, 22:28 [IST]

Subscribe to Oneindia Tamil

சென்னை: தமிழ் திரையுலகில் தனது நகைச்சுவையாலும், மிமிக்ரி திறமையாலும் கோடிக்கணக்கான ரசிகர்களின் மனதைக் கவர்ந்த நடிகர் ரோபோ சங்கர், உடல்நலக் குறைவால் காலமானார். அவரது மறைவுச் செய்தி, சின்னத்திரை மற்றும் வெள்ளித்திரை கலைஞர்கள், மற்றும் ஒட்டுமொத்த ரசிகர் சமூகத்தையும் அதிர்ச்சியிலும் சோகத்திலும் ஆழ்த்தியுள்ளது.

ரோபோ சங்கர் பயோகிராபி

மதுரையைச் சேர்ந்த சங்கர், தனது தனித்துவமான உடல்மொழி மற்றும் குரல் மாடுலேஷன் மூலம் ரசிகர்களைக் கவர்ந்தார். ஆரம்பத்தில் மேடை நிகழ்ச்சிகளில் ரோபோ வேடமிட்டு நடனமாடியதால், ரோபோ சங்கர் என்றே அழைக்கப்பட்டார். விஜய் டிவியில் ஒளிபரப்பான கலக்கப்போவது யாரு? போன்ற பல நகைச்சுவை நிகழ்ச்சிகள் இவருக்குப் பெரும் புகழைக் கொடுத்தன. பின்னர், சினிமா வாய்ப்புகளைப் பயன்படுத்தி, முன்னணி நகைச்சுவை நடிகர்களில் ஒருவராக உயர்ந்தார்.

இயக்குநர் பாலாஜி மோகன் இயக்கிய மாரி திரைப்படம் அவருக்குப் பெரிய திருப்புமுனையாக அமைந்தது. அந்தப் படத்தில் தனுஷுடன் இணைந்து இவர் நடித்த காட்சிகள் பெரிதும் பேசப்பட்டன. அதன் பிறகு, அவர் பல முன்னணி நட்சத்திரங்களின் படங்களில் நடித்தார். லயன் கிங் போன்ற திரைப்படங்களில் பின்னணிக் குரல் கொடுத்தது, குழந்தைகளுக்கும் பிடித்தமானதாக இருந்தது.

சவால்களை சந்தித்த வாழ்க்கை

ரோபோ சங்கரின் வாழ்க்கை வெற்றிகள் நிறைந்ததாக இருந்தாலும், பல சவால்களையும் கண்டது. சில ஆண்டுகளுக்கு முன்பு அவர் வீட்டில் கிளி வளர்த்ததால், அது ஒரு சர்ச்சையாக வெடித்தது. இந்த விவகாரம், அவருக்குப் பெரும் மன உளைச்சலை ஏற்படுத்தியது.

2023-ல் அவருக்கு மஞ்சள் காமாலை நோய் ஏற்பட்டது, அதன் காரணமாக அவரது உடல் எடை வெகுவாகக் குறைந்தது. இந்த நோய் பாதிப்பில் இருந்து மீண்டு வந்த அவர், தனது அனுபவங்களைப் பற்றிப் பேசியது பலருக்கும் ஒரு பாடமாக அமைந்தது.

எலிமினேஷனுக்கு பயப்படமாட்டேன்

சமீபத்தில் ஒரு சன் டிவி நிகழ்ச்சியில், ரோபோ சங்கர் எலிமினேஷன் செய்யப்பட்டார். இதுபோல எலிமினேஷன் செய்யும்போது பல போட்டியாளர்கள் கண்கலங்கி அழும்போது, அவர் மட்டும் சிரித்துக் கொண்டிருந்தார். அப்போது, அவரிடம் தொகுப்பாளர், "இந்த எலிமினேஷனை நினைத்து வருத்தப்படாதீங்க, வைல்டு கார்டு ரவுண்டு இருக்கு" என்று ஆறுதல் சொன்னார். அதற்கு ரோபோ சங்கர், "நான் எந்த எலிமினேஷனுக்கும் பயப்படற ஆள் கிடையாது. பல எலிமினேஷன்களைப் பார்த்துதான் இந்த இடத்திற்கு வந்திருக்கிறேன்" என்று தைரியமாகப் பேசியது இணையத்தில் பலராலும் பாராட்டப்பட்டது. தனியாகப் போராடி, எந்தக் குழு ஆதரவும் இல்லாமல் சினிமாவில் தனக்கென ஒரு இடத்தைப் பிடித்த அவரது தன்னம்பிக்கை, இந்த வார்த்தைகளில் வெளிப்பட்டது.

மனமுடைந்த நண்பர்கள்

ரோபோ சங்கர், சிகிச்சை பலனின்றி, 46 வயதில் காலமானார். ரோபோ சங்கரின் நண்பரான நடிகர் ஆதவன் தனது சமூக வலைத்தள பக்கத்தில், "சென்று வா நண்பா... RIP" என்று தனது இரங்கலைத் தெரிவித்துள்ளார். மற்றொரு நண்பரான நாஞ்சில் விஜயன், "ஒரு உண்மையான கலைஞனை இந்தத் தமிழ் சினிமா இழந்துவிட்டது" என்று உருக்கமாகப் பதிவிட்டுள்ளார். அதுபோல கமல்ஹாசன் உட்பட திரை பிரபலங்கள் பலரும் ரோபோ சங்கர் மறைவுக்கு வருத்தம் தெரிவித்து வருகின்றனர்.

ரோபோ சங்கர் தனது நகைச்சுவையால் பலரைச் சிரிக்க வைத்தாலும், அவரது மரணம் அனைவரையும் சோகத்தில் ஆழ்த்தியுள்ளது. அவரது ஆன்மா சாந்தியடையட்டும்.

Published On September 18, 2025