என்னது 90'ஸ் ஹீரோவும் ‘பூமர் அங்கிளும்’ ஒரே ஆளா? - பாய்ந்த நெட்டிசன்கள்.. சக்திமானுக்கு நேர்ந்த கதி!
மும்பை : 90'ஸ் கிட்ஸின் சூப்பர் ஹீரோவான 'சக்திமான்' கதாபாத்திரத்தில் நடித்து புகழ்பெற்ற முகேஷ் கன்னாவின் கருத்து பெரும் சர்ச்சையை ஏற்படுத்தியுள்ளது. நெட்டிசன்கள் பலரும் அவரது கருத்தை கடுமையாக விமர்சித்துள்ளனர்.
முகேஷ் கன்னா ஒரு யூடியூப் சேனலை நடத்தி வருகிறார். அதில் அவர் வெளியிட்டுள்ள வீடியோவில், உடலுறவை விரும்பிக் கேட்கும் பெண்கள் பெண்கள் அல்ல, பாலியல் தொழிலாளர்கள் என்று கூறியிருந்தார்.
இந்த குறிப்பிட்ட கருத்தால் இணையவாசிகள் கடும் கோபமடைந்துள்ளனர். நடிகர் முகேஷ் கன்னாவை "செக்ஸிஸ்ட்" என்றும் 'பூமர் அங்கிள்' என்றும் விமர்சித்துள்ளனர்.
சக்திமான்
90'ஸ் கிட்ஸின் ஃபேவரிட் சூப்பர் ஹீரோ சக்திமான். 90களின் இறுதி மற்றும் 2000த்தின் ஆரம்ப கால கட்டத்தில் பிரபலமான தொலைக்காட்சித் தொடராக தூர்தர்ஷனில் சக்கைப்போடு போட்டது சக்திமான். இந்தத் தொடர் அன்றைய சிறுவர்களின் அபிமான நிகழ்ச்சியாக இருந்தது. அதற்காகவே காத்திருந்து தொலைக்காட்சி பார்த்த தலைமுறையினர் இன்றைக்கு இளைஞர்களாக இருக்கிறார்கள். இந்தியாவின் சூப்பர் ஹீரோவான சக்திமான், ஒட்டுமொத்த சிறார்களின் மனதையும் குத்தகைக்கு எடுத்திருந்தார்.
முகேஷ் கன்னா
சக்திமான் தொலைக்காட்சி தொடரில் பண்டிட் கங்காதர் வித்யாதர் மாயாதர் ஓம்கார்நாத் சாஸ்திரி என்ற 'சக்திமான்' கதாபாத்திரத்தில் முகேஷ் கன்னா நடித்து இருந்தார். 90'ஸ் கிட்ஸின் மறக்க முடியாத ஹீரோவான சக்திமான் கதாபாத்திரத்தில் நடித்த முகேஷ் கன்னா தான் தற்போது ஒரு சர்ச்சையில் சிக்கியுள்ளார். முகேஷ் கன்னா யூ-ட்யூப் சேனல் ஒன்றை நடத்தி வருகிறார்.
சர்ச்சை பேச்சு
முகேஷ் கன்னா தனது யூடியூப் சேனலில் பெண்கள் குறித்து சர்ச்சைக்குரிய வகையில் பேசியுள்ளார். "பாலியல் உறவுக்கு ஆசைப்பட்டு, ஆண்களை அழைக்கும் பெண்கள் பாலியல் தொழிலாளர்களே. ஏனென்றால், நாகரிக சமுதாயத்தைச் சேர்ந்த எந்தவொரு கண்ணியமான பெண்ணும் இப்படி நடந்துகொள்ள மாட்டார்கள்" என்று முகேஷ் கன்னா தெரிவித்துள்ளார்.
நெட்டிசன்கள் கண்டனம்
பெண்கள் பற்றிய முகேஷ் கன்னாவின் இந்தக் கருத்துக்கு நெட்டிசன்கள் கடும் எதிர்ப்பு தெரிவித்துள்ளனர். "90'ஸ் கிட்ஸின் ஆஸ்தான ஹீரோவான சக்திமானும் பூமர் அங்கிள் தான்" என்றும், "முகேஷ் கன்னாவின் இந்த லாஜிக்கை கேட்டால் படிப்பறிவே இல்லாதவர்களும் சிரிப்பார்கள்" என்றும் "சக்திமான் இந்த முறை நிற்பது அநீதியின் பக்கம்" என்றும் நெட்டிசன்கள் பலவாறாக விமர்சித்து வருகின்றனர்.
மன்னிப்பு கேட்க வேண்டும்
சிறுவர்கள் மத்தியில் பிரபலமான முகேஷ் கன்னா போன்றவர்கள் பொதுவெளியில் கருத்துக்களைத் தெரிவிக்கும் முன் யோசித்துப் பேச வேண்டும் எனவும், பெண்கள் பற்றி இழிவாகப் பேசிய முகேஷ் கன்னா தனது கருத்துக்காக பகிரங்கமாக மன்னிப்பு கேட்கவேண்டும் எனவும் பலரும் கருத்து தெரிவித்து வருகின்றனர்.
Click it and Unblock the Notifications
Sign in with Google