சினேகன்- கன்னிகா தம்பதிக்கு இரட்டை குழந்தைகள்! தாயே எந்தன் மகளாய் மாற! கவிஞர் உருக்கம்

Updated: Thursday, January 30, 2025, 23:50 [IST]

Subscribe to Oneindia Tamil

சென்னை: கவிஞர் சினேகன்- நடிகை கன்னிகா தம்பதிக்கு இரட்டை பெண் குழந்தைகள் பிறந்துள்ளன. தாயும் சேய்களும் நலமாக இருப்பதாக கவிஞர் சினேகன் மகிழ்ச்சி பொங்க தெரிவித்துள்ளார்.

இதுகுறித்து கன்னிகா சினேகனின் இன்ஸ்டாகிராம் பக்கத்தில் கூறியிருப்பதாவது: "இறைவா நீ ஆணையிடு
தாயே எந்தன்

மகளாய் மாற "... என்ற எனது அன்பின் கோரிக்கை இரட்டிப்பாய் நிறைவேறியது...

தாயே எந்தன் மகளாகவும் ..
மகளே எந்தன் தாயாகவும் ...
இரு தேவதைகள் 25.01.2025 அன்று பிறந்திருக்கிறார்கள் ...

இதயமும்,மனமும்
மகிழ்ச்சியில் நெகிழ்ந்து
நிரம்பி வழிகிறது ...

உங்களின் தூய அன்பினால்
எங்கள் வாரிசுகளை
வாழ்த்துங்கள்.

என்றும் அன்புடன்
சினேகன்
கன்னிகா சினேகன் . இவ்வாறு அந்த பதிவில் குறிப்பிடப்பட்டுள்ளது.

தமிழ் சினிமாவில் ஏராளமான பாடலாசிரியர்கள் இருக்கும் நிலையில் தனக்கென தனி இடத்தை பிடித்தவர் சினேகன். இதுவரை இவர் சுமார் 70-க்கும் மேற்பட்ட படங்களில் பாடல்களை எழுதியுள்ளார்.

இவர் கோமாளி, ஆனந்தம் விளையாடும் வீடு போன்ற படங்களில் நடித்துள்ளார். பிக்பாஸ் சீசன் 1 நிகழ்ச்சியில் கலந்து கொண்டார் சினேகன். இந் நிகழ்ச்சியில் சிறப்பாக விளையாடி ஃபைனலிஸ்டில் ஒருவராக வந்தார். பிறகு பட வாய்ப்புகள் கிடைக்காத நிலையில் அவர் கமல்ஹாசனின் மக்கள் நீதி மய்யம் கட்சியில் இணைந்துள்ளார்.

கடந்த 2021 ஆம் ஆண்டு நடந்த சட்டசபை தேர்தலில் கமலின் மக்கள் நீதி மய்யம் கட்சி சார்பில் சென்னை விருகம்பாக்கம் தொகுதியில் போட்டியிட்டு டெபாசிட் இழந்தார். இவர் நடிகை கன்னிகாவை நீண்ட காலமாக காதலித்து வந்ததாக கூறப்படுகிறது.

முதலில் இவர்களது வயது வித்தியாசம் குறித்து அதிகம் விமர்சிக்கப்பட்டது. ஆனாலும் அதையெல்லாம் உடைத்தெறிந்துவிட்டு வெற்றிகரமான தம்பதியாக வலம் வந்தனர். இந்த நிலையில் கன்னிகா கர்ப்பமடைந்தார். அவருக்கு 5ஆவது மாதத்தில் செய்யும் சடங்குகள் செய்யப்பட்டிருந்தன.

அது போல் அண்மையில் அவருக்கு சீமந்தமும் நடைபெற்றது. கன்னிகாவை உள்ளங்கையில் வைத்து தாங்கினார் சினேகன். இந்த நிலையில் கடந்த 25 ஆம் தேதி தங்களுக்கு இரு தேவதைகள் பிறந்ததாக சினேகன் உருக்கமாக தெரிவித்துள்ளார். இதையடுத்து சினேகன்- கன்னிகாவுக்கு வாழ்த்துகள் குவிந்து வருகின்றன.

கன்னிகா சன் டிவியில் ஒளிபரப்பாகி வந்த கல்யாண வீடு எனும் சீரியலில் நடித்துள்ளார். அதுபோல் வெள்ளித்திரையிலும் கன்னிகா தேவராட்டம், அடுத்த சாட்டை போன்ற படங்களிலும் நடித்துள்ளார். கடந்த ஜூலை மாதம் இவர்கள் இருவரும் மூன்றாவது திருமண நாளை கொண்டாடிய நிலையில் நாங்கள் அப்பா, அம்மா ஆக போவதாக கன்னிகா இன்ஸ்டாவில் தெரிவித்திருந்தார். அது போல் தற்போது சினேகன், கலைஞர் டிவியில் ஒரு சீரியலில் நடித்து வருகிறார். கன்னிகாவும் தலைமுடிக்கான எண்ணெய்யை ஆன்லைனில் விற்பனை செய்து வருகிறார். அவருக்கு ஓவியம் வரைவதில் ஆர்வம் அதிகம்.