மீண்டும் சன் டிவியில் ஒளிபரப்பாக இருக்கும் “ராமாயணம்”.. ப்ரோமோ வெளியீடு!
சென்னை: இராமாணம் இதிகாசத் தொடர் மீண்டும் சன் தொலைக்காட்சியில் ஒளிபரப்பாக உள்ளது. இதற்கான ப்ரோமோ வீடியோவை வெளியிட்டுள்ளது சன் டிவி.
வாலிமீகியால் படைக்கப்பட்ட இதிகாசமான 'இராமாயணம்' உலகெங்கிலும் பெரும் புகழ் பெற்றது. வால்மீகியின் இராமாயணத்தைத் தழுவிப் பல இந்திய மொழிகளிலும், வெளிநாட்டு மொழிகளிலும் இராமாயணம் இயற்றப்பட்டுள்ளது. கம்பர் தனது கற்பனைகளை இணைத்து இதனைத் தமிழில் கம்ப இராமாயணமாக இயற்றினார்.
கோசல நாட்டின் தலைநகரமான அயோத்தியை சேர்ந்த ரகு வம்ச இளவரசரான ராமர், அவரது மனைவி சீதை ஆகியோரின் வாழ்க்கையைச் சுற்றி விவரிக்கும் "இராமாயணம்" உறவுகளுக்கு இடையேயான கடமை, வாழ்வியல், போர் முறைகள் உள்ளிட்டவற்றை எடுத்துக் காட்டும் காவியமாக பலராலும் போற்றப்படுகிறது.
நூலாகவும், செவிவழிக் கதையாகவும், வெகுமக்கள் பரப்பை எட்டிய ராமாயணம், தொலைக்காட்சி தொடராகவும் வெளிவந்து சக்கைப் போடு போட்டது. இந்தி, தமிழ் உள்ளிட்ட மொழிகளில் பல்வேறு காலகட்டங்களில் வெளியிடப்பட்ட இராமாயணம் தொடருக்கு பெரும் ரசிகர் பட்டாளம் உண்டு.
தொலைக்காட்சி தொடர்கள் வாயிலாக இராமாயணம் இந்தியாவில் வசிக்கும் மக்களோடு மட்டும் நிற்காமல், உலக அளவில் சென்றது. மக்கள் எத்தனை முறை ராமாயணம் இதிகாசக் கதைகளைக் கேட்டிருந்தாலும், டிவியில் தொடரை பார்த்தாலும், ஒவ்வொரு முறை மீண்டும் ஒளிபரப்பாகும் போதும் ஆர்வத்தோடு பார்த்து வருகின்றனர்.
இந்நிலையில், தமிழின் முன்னணி தொலைக்காட்சியான சன் டிவியில் "இராமாயணம்" மீண்டும் ஒளிபரப்பாக உள்ளது. "சீதையின் இதயநாயகன்.. இராமாயணம்.. விரைவில்" எனக் குறிப்பிட்டு ப்ரொமோ வீடியோ சன் டிவியின் சமூக வலைதள பக்கத்தில் வெளியிடப்பட்டுள்ளது.
அயோத்தி ராமர் கோவில் இந்த ஆண்டு பிப்ரவரியில் திறப்பு விழா கண்ட நிலையில், ராமர் பற்றிய பேச்சுகள் புழக்கத்தில் அதிகரித்துள்ளன. இந்நிலையில் மீண்டும் 'இராமாயணம்' இதிகாசத் தொடரை ஒளிபரப்பு செய்ய இருக்கிறது சன் தொலைக்காட்சி.
முன்பு சன் டிவியில் வாரந்தோறும் ஞாயிற்றுக் கிழமைகளில் மட்டும் 'ராமாயணம்’ ஒளிபரப்பானது. இந்நிலையில், தற்போது ஒளிபரப்பாக உள்ள ராமாயணம் அதேதானா? அல்லது மீண்டும் எடுக்கப்பட்டதா என்பது அறிவிக்கப்படவில்லை.
மேலும், “இராமாயணம்” தொடர் எந்தெந்த நாட்களில் ஒளிபரப்பாகும், எப்போது முதல் ஒளிபரப்பு தொடங்குகிறது என்ற தகவல்களும் விரைவில் அறிவிக்கப்படும் என எதிர்பார்க்கப்படுகிறது.
Click it and Unblock the Notifications
Sign in with Google