முதல்வர் விஜய்யின் மகன் ஜேசன் சஞ்சய் இயக்கிய சிக்மா படம் எப்போது ரிலீஸ்? ஜெயிப்பாரா இந்த ஜூனியர்?

சென்னை: தமிழக முதல்வர் விஜய்யின் மகன் ஜேசன் சஞ்சய் இயக்கிய சிக்மா (SIGMA) திரைப்படம் எப்போது திரைக்கு வருகிறது என்பது குறித்த தகவல்கள் வெளியாகியுள்ளன.

தமிழ் சினிமாவின் உச்ச நட்சத்திரம் மற்றும் தமிழக வெற்றிக் கழகத்தின் தலைவர் விஜய் - சங்கீதா தம்பதியின் விவாகரத்து விவகாரம் கடந்த சில மாதங்களாக சமூகவலைத்தளங்களில் பெரும் பேசுபொருளாக மாறியுள்ளது.

விஜய் தனது குழந்தைகளை கூட சந்திப்பதில்லை என்ற விமர்சனம் எழுந்தது. இந்தச் சூழலில், விஜய் மகன் ஜேசன் சஞ்சய் இயக்கும் "சிக்மா" (Sigma) திரைப்படத்தின் புதிய போஸ்டர் வெளியாகி, மேலும் பல விவாதங்களை கிளப்பியுள்ளது.

விவாகரத்து மனுவில் இருப்பதாக வெளியான தகவல்: நடிகர் விஜய்யும் அவரது மனைவி சங்கீதாவும் விவாகரத்து கோரி நீதிமன்றத்தை நாடியுள்ளதாகக் கூறப்படும் நிலையில், சங்கீதாவின் மனுவில் இருப்பதாக ஒரு தகவல் அண்மையில் பரவி அதிர்ச்சியை ஏற்படுத்தியது.

அதில், "ஒரு குறிப்பிட்ட நடிகையுடன் திருமணத்தை மீறிய உறவில் விஜய் இருந்தார். அதனைப் பூதாகரமாகக் கண்டுபிடித்த பிறகு, நான் விஜயால் ஏமாற்றப்பட்டதாக உணர்ந்தேன். இந்த விவகாரத்தால் எனக்குக் கடுமையான மன உளைச்சல் ஏற்பட்டது. இதன் காரணமாக, கடந்த 2021-ம் ஆண்டு முதல் நாங்கள் ஒரே வீட்டில் வசித்தாலும், கணவன் மனைவியாக வாழாமல் தனித்தனியாகவே வாழ்ந்து வந்தோம்" என்று சங்கீதா தரப்பில் குறிப்பிடப்பட்டுள்ளதாக சமூக ஊடகங்களில் செய்திகள் உலா வருகின்றன.

இன்ஸ்டாகிராமில் அன்ஃபாலோ செய்த சஞ்சய்?

பெற்றோருக்குள் ஏற்பட்ட இந்த விரிசலுக்குப் பிறகு, ஜேசன் சஞ்சய் தனது தந்தை விஜய்யை சமூக வலைத்தளமான இன்ஸ்டாகிராமில் பின்தொடர்வதை (Follow) நிறுத்திவிட்டதாக (Unfollow) நெட்டிசன்கள் கண்டுபிடித்துப் பகிர்ந்து வருகின்றனர். இது தந்தை - மகன் உறவிலும் விரிசல் ஏற்பட்டுள்ளதைக் காட்டுவதாகப் பலரால் பார்க்கப்படுகிறது.

பெயர் மாற்ற சர்ச்சையும் புதிய போஸ்டரும்

இதற்கிடையே, ஜேசன் சஞ்சய் இயக்குநராக அறிமுகமாகும் "சிக்மா" திரைப்படத்தின் டைட்டில் கார்டு மற்றும் ஒப்பந்த கையெழுத்துப் பகுதிகளில், அவர் தனது தந்தையின் பெயரைக் குறிக்கும் இன்ஷியலைத் தவிர்த்துவிட்டு, தாயின் பெயரைக் குறிக்கும் விதமாகவோ அல்லது புதிய பாணியிலோ "Jason Sanjay S" (சங்கீதா என்பதைக் குறிக்கும் விதமாக இருக்கலாம் என யூகிக்கப்படுகிறது) எனப் பயன்படுத்தியதாகத் தகவல் வெளியாகிப் பரபரப்பை ஏற்படுத்தியது.

முன்னதாக வெளியான போஸ்டர்களில் "Jason Sanjay'S 'சிக்மா'" என்றே விளம்பரம் செய்யப்பட்டிருந்தது. அதாவது ஜேசன் சஞ்சயின் என்பதுதான் அந்த எஸ்ஸின் ('S) பொருளே தவிர அவர் இனிஷியலை மாற்றவில்லை என சொல்லப்பட்டது.

ஆனால், தற்போது இந்த சர்ச்சைகளுக்கு முற்றுப்புள்ளி வைக்கும் விதமாகவோ அல்லது புதிய உத்தியாகவோ, படத்தின் அதிகாரப்பூர்வ ரிலீஸ் தேதி அறிவிக்கப்பட்டுள்ள புதிய போஸ்டரில் ஜேசன் சஞ்சயின் பெயரில் எந்தவித இன்ஷியலும் இடம்பெறவில்லை. அதில் வெறும் 'Jason Sanjay' என்று மட்டுமே அச்சிடப்பட்டுள்ளது ரசிகர்களின் கவனத்தை ஈர்த்துள்ளது.

ஜூலை 31-ல் 'சிக்மா' ரிலீஸ்

ஆரம்பத்தில் ஏப்ரல் மாதம் வெளியாகும் என எதிர்பார்க்கப்பட்ட "சிக்மா" திரைப்படம், தற்போது வரும் ஜூலை 31 அன்று உலகமெங்கும் திரைக்கு வரவுள்ளது உறுதி செய்யப்பட்டுள்ளது. பிரபல தயாரிப்பு நிறுவனமான லைகா புரொடக்‌ஷன்ஸ் (Lyca Productions) தயாரிப்பில், அதிரடி ஆக்‌ஷன் பாணியில் உருவாகியுள்ள இப்படத்தின் டீசர் சமீபத்தில் வெளியாகி ரசிகர்களிடையே ஏற்கனவே பெரும் வரவேற்பைப் பெற்றுள்ளது.

இப்படத்தில் சந்தீப் கிஷன் கதாநாயகனாக நடிக்க, அவருடன் ஃபரியா அப்துல்லா, ராஜு சுந்தரம், சம்பத் ராஜ், ஷிவ் பண்டிட், அன்பு தாசன், யோக் ஜாபி உள்ளிட்ட பல நட்சத்திரங்கள் முக்கிய கதாபாத்திரங்களில் நடித்துள்ளனர். இப்படத்திற்கு இசையமைப்பாளர் தமன் இசையமைத்துள்ளார் என்பது குறிப்பிடத்தக்கது.

English summary

Fresh updates have emerged regarding the theatrical release of SIGMA, directed by Jason Sanjay, the son of Vijay. Fans are eagerly awaiting the debut project, which has already generated strong buzz in Kollywood circles.