கேரளாவின் முதல் பெண் ஐபிஎஸ், டிஜிபி வரிசையில்! திருவனந்தபுரத்தின் மேயராகிறாரா ஸ்ரீலேகா! யார் இவர்?

திருவனந்தபுரம்: கேரள உள்ளாட்சி தேர்தலில் திருவனந்தபுரம் மாநகராட்சியை பாஜக கைப்பற்றியுள்ள நிலையில் அதன் மேயராக யாருக்கு வாய்ப்பு என்ற கேள்வி எழுந்துள்ளது. அதன்படி ஸ்ரீலேகா என்பவருக்கு இந்த மேயர் பதவி கொடுக்கப்படலாம் என்கிறார்கள். யார் அவர் என்பதை பார்க்கலாம்.

கேரள உள்ளாட்சி தேர்தலில் திருவனந்தபுரம் மாநகராட்சியை 45 ஆண்டுகளுக்கு பிறகு பாஜக கைப்பற்றியுள்ளது. இங்குள்ள 101 வார்டுகளில் 50 வார்டுகளை கைப்பற்றியுள்ளது. இதனால் இந்த மாநகராட்சிக்கு மேயராக பாஜகவை சேர்ந்தவர் வருவார் என்பது அனைவரும் அறிந்ததுதான்.

அந்த வகையில் ஸ்ரீலேகா என்பவருக்கு இந்த வாய்ப்பு கிடைக்கும் என சொல்லப்படுகிறது. கேரளாவின் முதல் பெண் ஐபிஎஸ் அதிகாரியான இவர் பாஜகவின் முதல் மேயராக தேர்வு செய்யப்படுவார் என்கிறார்கள்.

ஸ்ரீலேகா திருவனந்தபுரம் மாநகராட்சிக்குள்பட்ட சாஸ்தமங்கலம் தொகுதியில் வெற்றி பெற்றுள்ளார். 65 வயதை நெருங்கும் அவருக்கு மேயர் பதவி கொடுக்கப்படலாம் என சொல்லப்படுகிறது.

இந்த வெற்றி குறித்து அவர் கூறுகையில், சாஸ்தமங்கலம் வார்டில் வேறு எந்த வேட்பாளரும் இதற்கு முன்பு இவ்வளவு வாக்குகளை பெற்றதில்லை. இந்த தீர்ப்புக்காக மக்களுக்கு நன்றி என தெரிவித்துள்ளார்.

திருவனந்தபுரத்தில் பிறந்து வளர்ந்த ஸ்ரீலேகா, 1987 ஆம் ஆண்டு முதல் பெண் ஐபிஎஸ் ஆனார். 30 ஆண்டுகளுக்கு மேல் சிறப்பாக பணி செய்த அவர் சிபிஐ, லஞ்ச ஒழிப்பு, தீயணைப்பு படை, மோட்டார் வாகனத் துறை, சிறைத் துறை உள்ளிட்ட துறைகளில் பணியாற்றியுள்ளார்.

2017ஆம் ஆண்டு கேரளாவின் முதல் பெண் டிஜிபியாக பதவி உயர்வு பெற்றார். 33 ஆண்டுகளுக்கும் மேலாக காவல் துறையில் பணியில் இருந்த அவர் டிசம்பர் 2020 ஆம் ஆண்டு ஓய்வு பெற்றார். அதன் பிறகு பிரதமர் நரேந்திர மோடியின் ஆட்சியை கண்டு வியந்து 2024 ஆம் ஆண்டு பாஜகவில் இணைந்தார். இப்படி முதல் பெண் ஐபிஎஸ், முதல் பெண் டிஜிபி என பதவிகளை பெற்ற ஸ்ரீலேகா, பாஜகவின் முதல் மேயர் என்ற பெருமையையும் பெறுவாரா? என்ற கேள்வி எழுந்துள்ளது.