இந்தியாவில் நுழைந்த மங்கி பாக்ஸ்! கேரளாவில் ஒருவருக்கு பாதிப்பு உறுதி! அறிகுறி என்ன? எப்படி பரவும்

Updated: Thursday, July 14, 2022, 23:31 [IST]

Subscribe to Oneindia Tamil

திருவனந்தபுரம்: வெளிநாட்டில் இருந்து கேரளா திரும்பிய நபருக்கு மங்கி பாக்ஸ் பாதிப்பு உறுதி செய்யப்பட்டு உள்ளது.

மங்கி பாக்ஸ்

இந்தச் சூழலில் மங்கி பாக்ஸ் என்ற நோய்ப் பாதிப்பு பரவுவது மக்களிடையே அச்சத்தை ஏற்படுத்தி உள்ளது. இந்த மங்கி பாக்ஸ் புதுவித நோய் இல்லை. ஆப்பிரிக்காவில் இந்த வகை நோய் காணப்படும் என்றாலும் கூட ஆப்பிரிக்காவுக்கு வெளியே இந்த வைரஸ் இந்தளவுக்குப் பரவுவது இதுவே முதல்முறையாகும். இதற்கான காரணத்தை ஆய்வாளர்களால் இதுவரை கண்டறிய முடியவில்லை.

கேரளா

இந்தியாவில் இதுவரை மங்கி பாக்ஸ் பாதிப்பு பரவாமலேயே இருந்தது. ஆனால், இன்று காலை கேரள விமான நிலையத்தில் ஒருவருக்கு மங்கி பாக்ஸ் ஒத்த பாதிப்பு இருப்பதாகக் கூறப்பட்டது. சமீபத்தில் வெளிநாட்டில் இருந்து கேரளா திரும்பிய ஒருவருக்கு மங்கி பாக்ஸ் பாதிப்பு இருப்பதாகச் சந்தேகிக்கப்படுவதாகக் கேரள சுகாதாரத்துறை அமைச்சர் வீணா ஜார்ஜ் தெரிவித்து இருந்தார்

மங்கி பாக்ஸ் உறுதி

அந்த நபரிடம் இருந்து மாதிரிகள் சேகரிக்கப்பட்டு புனேவில் உள்ள தேசிய வைராலஜி நிறுவனத்திற்கு அனுப்பி வைக்கப்பட்டது. சோதனை முடிவுகள் இன்று மாலை வெளியானது. அதில் அந்த நபருக்கு மங்கி பாக்ஸ் பாதிப்பு இருப்பது உறுதி செய்யப்பட்டது. அந்த நபர் ஐக்கிய அரபு எமிரேட்ஸில் இருந்து கேரளா திரும்பி உள்ளார். முன்னதாக மங்கி பாக்ஸ் ஒத்த அறிகுறிகள் இருந்த நிலையில் அவர் தனிமைப்படுத்தப்பட்டார்.

நெருங்கிய தொடர்பு

அந்த நபரின் பெயர், வயது உள்ளிட்ட இதர தகவல்கள் வெளியிடப்படவில்லை. அதேநேரம் அவர் வெளிநாட்டில் மங்கி பாக்ஸ் நோயால் பாதிக்கப்பட்ட ஒருவருடன் தான் நெருங்கிய தொடர்பில் இருந்ததாகவும் அந்த நபரின் குடும்பத்தினரும் தீவிர கண்காணிப்பில் உள்ளதாகவும் கேரள சுகாதாரத் துறை அமைச்சர் வீணா ஜார்ஜ் கூறினார். இது கொரோனாவை போல இல்லாமல் நெருங்கிய தொடர்பு உள்ளவர்களுக்கு மட்டுமே பரவும் என்பதால் அச்சப்படத் தேவையில்லை என்றும் அவர் தெரிவித்தார்.

எப்படிப் பரவும்

ஆர்த்தோபாக்ஸ் குடும்பத்தைச் சேர்ந்த வைரசால் இந்த பாதிப்பு ஏற்படுகிறது. ஏற்கனவே மங்கி பாக்ஸ் நோயால் பாதிக்கப்பட்ட நபரிடம் இருந்து வெளியேறும் நீர்த்துளிகள் வழியாகவே இந்த நோய் பரவுகிறது. இப்போது கண்டறியப்படும் பல வழக்குகள் ஆண்களுடன் உடலுறவு கொள்ளும் ஆண்களுக்கே பெரும்பாலும் ஏற்பட்டுள்ளது. இருந்த போதிலும், இந்த பாதிப்பு யாருக்கும் வேண்டுமானாலும் வரலாம் என்று ஆய்வாளர்கள் தெரிவித்துள்ளனர்

அறிகுறி என்ன

காய்ச்சல், தசைவலி, கொப்பளங்கள், சளி ஆகியவை இந்த மங்கி பாக்ஸின் பொதுவான அறிகுறிகளாகும். இந்த வைரசால் பாதிக்கப்பட்டவர்களில் 3 முதல் 6 சதவீதம் பேர் உயிரிழக்கும் வாய்ப்பு உள்ளது. இருப்பினும், பெரும்பாலான மக்கள் 3 முதல் 4 வாரங்களில் குணமடைந்துவிடுவார்கள். தற்போது வரை மங்கி பாக்ஸ் பாதிப்பிற்குக் குறிப்பிட்ட சிகிச்சை முறை எதுவும் இல்லை. நோயாளிகள் தனிமைப்படுத்தும் மருத்துவமனையில் தங்கி சிகிச்சை பெற வேண்டி இருக்கும்.