கேரளாவில் பள்ளி ஆண்டு விடுமுறையை ஜூன், ஜூலைக்கு மாற்ற திட்டம்.. பொதுமக்களிடம் கருத்து கேட்பு

Updated: Friday, August 1, 2025, 11:20 [IST]

Subscribe to Oneindia Tamil

திருவனந்தபுரம்: மழைப் பொழிவு அதிகமாக இருக்கும் மாநிலமான கேரள மாநிலத்தில், பள்ளிக்கான கோடை விடுமுறையை ஏப்ரல் மே மாதத்தில் இருந்து மாற்றி, மழைக் காலமான ஜூன், ஜூலைக்கு வழங்குவது குறித்து அரசு திட்டமிட்டு வருகிறது. இத்திட்டம் தொடர்பாக பொதுமக்கள் தங்களது கருத்துகளையும், பரிந்துரைகளையும் தெரிவிக்கலாம் என்று அம்மாநிலத்தின் பள்ளிக் கல்வித் துறை அமைச்சர் சிவன்குட்டி தெரிவித்துள்ளார்.

கோடை விடுமுறை

பள்ளி, கல்லூரி மாணவ, மாணவிகளுக்கு ஆண்டுதோறும் ஏப்ரல், மே மாதங்களில் கோடை விடுமுறை விடப்படுவது வழக்கம். மழைக் காலங்களில் அந்தந்த மாவட்டங்களால் உள்ளூர் விடுமுறை அளிக்கப்பட்டு வருகிறது. கேரள மாநிலத்தில் அதிக மழைப் பொழிவு எப்போதும் இருக்கும். இதனால், கேரளத்தில் மழைக் காலங்களில் நிலச்சரிவு, வெள்ளப்பெருக்கு போன்ற பல்வேறு இயற்கை இடர்பாடுகள் ஏற்பட்டு வருகின்றன.

kerala-government-seeks-public-opinion-on-plan-to-shift-school-holidays-to-june-and-july

மழைக்கால விடுமுறை

இதனால், கேரள மாநிலத்தில் பள்ளி, கல்லூரி மாணவர்களுக்கு மழைக்கால உள்ளூர் விடுமுறைகள் அதிகமாக விடப்படும் சூழல் ஏற்படுகிறது. இந்நிலையில், கோடைக் காலமான ஏப்ரல், மே மாதங்களுக்கு பதிலாக மழைக் காலங்களில் ஜூன், ஜூலை மாதங்களில் பள்ளிகளுக்கு விடுமுறை விடுவது குறித்து கேரள பள்ளிக் கல்வித் துறை அமைச்சர் வி.சிவன் குட்டி சமூக வலைத்தளங்கள் மூலம் பொதுமக்களிடம் கருத்து கேட்டுள்ளார்.

ஜூன், ஜூலையில் பலத்த மழை

இதுகுறித்து, சிவன் குட்டி வெளியிட்டுள்ள அறிக்கையில் கூறியுள்ளதாவது: கேரள மாநிலத்தில் ஏப்ரல், மே மாதங்களில் பள்ளிகளுக்கு விடுமுறை விடப்பட்டு வருகிறது. இந்த மாதங்களில் மாநிலத்தில் கடும் வெப்பம் இருக்கும் என்பதால் குழந்தைகளுக்கு சிரமம் ஏற்படுகிறது உண்மைதான். அதேசமயம், மழைக் காலமான ஜூன், ஜூலை மாதங்களில் பெய்யும் பலத்த மழை காரணமாக பள்ளிகளுக்கு விடுமுறை விட வேண்டி நிலை உள்ளது.

தடைபடும் படிப்பு

இதனால், மாணவர்களின் படிப்பு தடைபடுகிறது. எனவே, பள்ளி விடுமுறையை ஏப்ரல், மே மாதங்களுக்கு பதிலாக மழைக்காலமான ஜூன், ஜூலை மாதங்களில் மாற்றுவது குறித்து பொது விவாதத்தை தொடங்கிவைக்கிறேன். கோடை காலமும், மழைக் காலமும் சேர்த்து மே, ஜூன் மாதங்களில் விடுமுறை விடுவது குறித்த யோசனையும் உள்ளது. பொதுமக்கள் தங்களது கருத்துகளை, பரிந்துரைகளை தெரிவிக்கலாம்.

கருத்து தெரிவிக்கலாம்

விடுமுறை குறித்து பொதுமக்கள் உங்களுடைய கருத்துகளையும், வழிகாட்டுதலையும் தெரிந்து கொள்ள விரும்புகிறேன். இந்தத் திட்டத்தை செயல்படுத்துவதில் என்ன நன்மைகள், தீமைகள் உள்ளன. குழந்தைகளின் படிப்பையும் ஆரோக்கியத்தையும் இது பாதிக்குமா? ஆசிரியர்கள் மற்றும் பெற்றோர்களுக்கும் இது நடைமுறையில் சாத்தியப்படுமா.

பிற மாநிலங்களிலும், பிற நாடுகளிலும் உள்ள விடுமுறை காலங்களில் இருந்து வித்தியாசமாக நாம் எப்படி முன்மாதிரியாக மாறலாம் என்பது போன்ற உங்கள் வழிகாட்டுதல்கள் மற்றும் கருத்துக்களை பதிவிடுங்கள். ஆக்கப்பூர்வமான விவாதத்தை தொடங்க இது உதவியாக இருக்கும் என நம்புகிறேன் என்று தெரிவித்துள்ளார்.