Onam Festival: நடனமாடிக் கொண்டிருந்த சட்டமன்ற ஊழியர்.. மயங்கி விழுந்து பரிதாபமாக பலி

திருவனந்தபுரம்: கேரள மக்களின் முக்கியப் பண்டிகையான ஓணம் பண்டிகை கொண்டாடப்பட்டு வருகிறது. இந்நிலையில், திருவனந்தபுரத்தில் ஓணம் கொண்டாட்டத்தின்போது நடனமாடிக் கொண்டிருந்த சட்டமன்ற ஊழியர் ஒருவர் மேடையிலேயே மயங்கி உயிரிழந்த சம்பவம் சோகத்தை ஏற்படுத்தியுள்ளது.

கேரள மக்களின் பாரம்பரியப் பண்டிகையான ஓணம் கொண்டாட்டம் அம்மாநில மக்களால் கோலாகலமாகக் கொண்டாடப்படுவது வழக்கம். பள்ளி, கல்லூரி, அரசு அலுவலகம் என அனைத்துப் பகுதிகளிலும் அத்தப்பூ கோலமிட்டு, பாரம்பரிய உடைகள் அணிந்து கொண்டாட்டத்தில் ஈடுபடுவார்கள். கேரளத்தில் ஆகஸ்ட் 26 முதல் செப்டம்பர் 5 ஆம் தேதி வரை ஓணம் பண்டிகை கொண்டாடப்படுகிறது.

முக்கியப் பண்டிகை செப்டம்பர் 5 ஆம் தேதி கொண்டாடப்படுகிறது. ஓணம் பண்டிகையை கொண்டாடுவதற்காக கல்வி, வேலை, தொழில் நிமித்தமாக பல்வேறு மாநிலங்களில் உள்ள கேரள மக்களும் தங்கள் சொந்த ஊர்களுக்கு படையெடுக்கத் தொடங்கியுள்ளனர். கேரள மாநிலத்தில் பள்ளிகள், கல்லூரிகள், அரசு மற்றும் தனியார் அலுவலகம் என ஒவ்வொரு பகுதிகளிலும் ஓணம் நிகழ்ச்சிகள் களைகட்டி வருகின்றன.

இந்நிலையில், திருவனந்தபுரத்தில் ஓணம் கொண்டாட்டத்தின்போது நடனமாடிக் கொண்டிருந்த சட்டமன்ற ஊழியர் ஒருவர் மேடையிலேயே மயங்கி உயிரிழந்த சம்பவம் சோகத்தை ஏற்படுத்தியுள்ளது.

கேரள மாநிலம், திருவனந்தபுரம் சட்டமன்ற மண்டபத்தில் ஓணம் நிகழ்ச்சிக்கு ஏற்பாடு செய்யப்பட்டிருந்தது. இந்த கொண்டாட்டத்தின் ஒரு பகுதியாக நடன நிகழ்ச்சி நடந்து கொண்டிருந்தது. துணை நூலகர் வி. ஜுனைஸ் (46) என்பவரும் தங்களது ஊழியர்களுடன், பாரம்பரிய உடை அணிந்து சிரித்த முகத்துடன் நடனமாடிக் கொண்டிருந்தார்.

அப்போது, மேடையிலேயே திடீரென அவர் மயங்கி விழுந்தார். அப்போது, அருகிலிருந்தவர்கள் செய்வதறியாது திகைத்தனர். இதையடுத்து, சக ஊழியர்கள் அருகே சென்று பார்த்தபோது ஜுனைஸ் உயிரிழந்த சம்பவம் தெரியவந்துள்ளது. வயநாட்டின் பத்தேரியைச் சேர்ந்தவர் ஜுனைஸ். இவர் நடனமாடிக் கொண்டிருந்தபோது மேடையிலேயே மயங்கி விழுந்து உயிரிழந்தது தொடர்பான வீடியோ தற்போது சமூக வலைதளங்களில் வைரலாகி வருகிறது.

English summary

Onam Festival: A tragic incident has occurred in Thiruvananthapuram when a legislative assembly employee fainted and died on stage while dancing during Onam celebrations.