அட்ஜெஸ்மெண்ட், உடை மாற்றும் அறை கூட இல்லை! மலையாள சினிமாவில் 17 பிரச்சனைகள்! ஹேமா கமிஷன் ரிப்போர்ட்

திருவனந்தபுரம்: மலையாள சினிமாவில் நடிகைகள் எதிர்கொள்ளும் பாலியல் துஷ்பிரயோக பிரச்சினைகள் குறித்து விசாரிக்க அமைக்கப்பட்ட ஓய்வுபெற்ற நீதிபதி ஹேமா தலைமையிலான கமிஷன் ரிப்போர்ட்டில் கூறப்பட்டுள்ள கருத்துகள் பகீர் கிளப்புவதாக இருக்கிறது. இதற்கிடையே இந்த ரிப்போர்ட்டில் பெண்கள் எதிர்கொள்ளும் 17 பிரச்சினைகள் என்ன என்பதையும் பட்டியலிட்டுள்ளனர்.

மலையாள சினிமாவின் முன்னணி நடிகை ஒருவர் கடந்த 2017ம் ஆண்டு கடத்தப்பட்டு பாலியல் பலாத்காரம் செய்யப்பட்டார். இந்தச் சம்பவம் அப்போது நாடு முழுக்க பேசுபொருள் ஆனது.

ஹேமா கமிஷன்: அந்த வழக்கு விசாரணை ஒரு பக்கம் நடக்க, மலையாள சினிமாவில் இதுபோல பல மோசமான சம்பவங்கள் பெண்களுக்கு எதிராக நடப்பதாக பகீர் தகவல்கள் வெளியானது. இதையடுத்து, மலையாள சினிமாவில் உள்ள நடிகைகள், தொழில்நுட்ப கலைஞர்கள் எதிர்கொள்ளும் பாலியல் ரீதியான பிரச்சினைகள் குறித்து விசாரிக்க ஓய்வுபெற்ற நீதிபதி ஹேமா தலைமையிலான கமிஷன் அமைக்கப்பட்டது.

இதற்கிடையே இந்த கமிஷன் ரிப்போர்ட்டில் இடம்பெற்றுள்ள தகவல்கள் பெரும் அதிர்வலைகளை ஏற்படுத்தியுள்ளது. இந்த ஹேமா கமிஷன் ரிப்போர்ட்டில் மலையாள சினிமாவில் பெண்கள் எதிர்கொள்ளும் 17 பிரச்சினைகள் குறித்து பகீர் தகவல்கள் இடம்பெற்றுள்ளன.

1. சினிமா துறையில் நுழைவதற்கும், தொடர்ந்து பட வாய்ப்புகளைப் பெறவும் நடிகைகள் பாலியல் ரீதியாக ஒத்துழைப்பு தர வேண்டும் என அழுத்தம் தரப்படுகிறது.

2. சூட்டிங் ஸ்பாட், போக்குவரத்து, தங்குமிடங்கள் உள்ளிட்டவற்றிலும் கூட பெண்களுக்கு எதிரான பாலியல் துன்புறுத்தல், துஷ்பிரயோகம் சம்பவங்கள் நடைபெறுகிறது.

3. பாலியல் ரீதியான கோரிக்கைகளுக்கு இணங்க மறுக்கும் நடிகைகளைக் குறிவைத்து சித்திரவதை செய்யும் சம்பவங்களும் நடக்கிறது.

4. சினிமாவில் பெண்களின் அடிப்படை மனித உரிமைகள் கூட மீறப்படுகிறது.. படப்பிடிப்பு தளத்தில் கழிவறை, உடை மாற்றும் அறை போன்ற அடிப்படை வசதிகள் கூட ஏற்படுத்தித் தருவது இல்லை.

5. சூட்டிங், தங்குமிடம், போக்குவரத்து போன்றவற்றில் பெண்களுக்கு உரியப் பாதுகாப்பு இல்லை.

6. சினிமாவின் பல்வேறு துறைகளில் பணிபுரியும் பெண்களுக்கு திடீரென சட்டவிரோதமாகத் தடை விதிப்பது.

7. தாங்கள் எதிர்கொள்ளும் பிரச்சினைகள் குறித்து பெண்கள் குரல் கொடுத்தால் இனி சினிமா துறையில் பணிபுரியவே முடியாத வகையில் தடை விதிக்கப்படும் என்ற மிரட்டுவது.

8. சினிமா துறையில் ஆண் ஆதிக்கம் மிக அதிகமாக இருக்கிறது. பாலின சார்பு மற்றும் பாகுபாடு மிக மோசமாக இருக்கிறது.

9. மது அருந்துதல், போதைப்பொருள் பயன்பாடு உள்ளிட்ட ஒழுக்கமின்மை சினிமாவில் மிக அதிகமாக இருக்கிறது.

10. பணியிடத்தில், தொலைப்பேசி மூலமாகப் பெண்களுக்கு எதிரான இழிவான மற்றும் அநாகரீகமான கருத்துக்களைச் சொல்லும் போக்கு அதிகரித்துள்ளது.

11. தனிப்பட்ட தேவைகளுக்கு ஏற்ப இரு தரப்பிற்கும் இடையே போடப்பட்டும் ஒப்பந்தங்களை நிறைவேற்ற மறுப்பது.

12. முன்பே ஒப்புக்கொண்ட ஊதியத்தை வழங்கத் தவறுவது.

13. ஆண்களுக்கும் பெண்களுக்கும் இடையே ஊதியத்தில் வேறுபாடு, தெளிவான பாலின பாகுபாடு இருக்கிறது.

14. பெண்களை சினிமாவில் குறிப்பாகத் தொழில்நுட்ப துறைகளில் அனுமதிக்க மிகப் பெரிய தயக்கம் இருக்கிறது. அந்த துறைகளில் பெண்களுக்கு வாய்ப்பே அளிக்கப்படுவது இல்லை.

15. அதிகரிக்கும் சைபர் தாக்குதல்கள்

16. தங்களுக்கு என்ன சட்ட ரீதியான பாதுகாப்பு, உரிமைகள் இருக்கிறது என்று பெண்களுக்கே உரிய விழிப்புணர்வு இல்லாமல் இருக்கிறது.

17. பெண்கள் எதிர்கொள்ளும் பிரச்சினைகளைத் தீர்க்க சட்டப்பூர்வமாக அதிகாரம் படைத்த எந்தவொரு அமைப்பும் இல்லாதது.

English summary

Hema Committee Report says from Illegal ban to remuneration issues women faces various issues in Malayalam film industry: Hema Committee Report about Malayalam film industry.