ஸ்கூட்டி ஓட்டும் பெண்களிடம் தப்பவே முடியாதா? கேரளா முதல்வர் பினராயி விஜயனுக்கு நேர்ந்ததை பாருங்க
திருவனந்தபுரம்: கேரள முதல்வர் பினராயி விஜயனின் கான்வாய் வாகனங்கள் நேற்று ஒன்றோடு ஒன்று மோதி விபத்துக்குள்ளானது. இதில் பினராயி விஜயன் காயமின்றி அதிர்ஷ்டவசமாக தப்பிய நிலையில் அந்த விபத்துக்கு ஸ்கூட்டி ஓட்டி சென்ற பெண் தான் முக்கிய காரணம் என்பது தெரியவந்துள்ளது.
கேரளாவில் இடதுசாரிகளின்ஆட்சி நடந்து வருகிறது. மார்க்சிஸ்ட் கம்யூனிஸ்ட் கட்சியை சேர்ந்த பினராயி விஜயன் 2வது முறையாக முதல்வராக பொறுப்பு வகித்து வருகிறார்.
இவர் நேற்று கோட்டயத்தில் இருந்து திருவனந்தபுரத்துக்கு காரில் சென்று கொண்டிருந்தார். பினராயி விஜயனின் பாதுகாப்புக்காக போலீசார் அவரது காரின் முன்பும், பின்பும் சென்றன.
இந்த கான்வாய் வாகனங்கள் மின்னல் வேகத்தில் சென்று கொண்டிருந்தன. திருவனந்தபுரம் வாமனபுரம் பார்க் அருகே கான்வாய் வாகனங்கள் சென்றன. அப்போது முதலில் சென்ற ஜீப் டிரைவர் திடீரென்று பிரேக் போட்டு நிறுத்தினார். இதையடுத்து பின்னால் வந்த வாகனங்களும் பிரேக் அடித்தன. ஆனாலும் வாகனங்கள் உடனடியாக நிற்காமல் முன்னால் சென்ற வாகனங்கள் மீது மோதின.
ஆம்புலன்ஸ் உள்பட அடுத்தடுத்து சென்ற 7 வாகனங்கள் ஒன்றோடு ஒன்று மோதி விபத்தை சந்தித்தன. கேரள முதல்வர் பினராயி விஜயன் சென்ற வாகனம் விபத்தில் சிக்கினாலும் கூட அவருக்கு எந்த காயமும் ஏற்படவில்லை. இந்த விபத்தில் வாகனங்கள் மட்டுமே சேதமடைந்தன. அதன்பிறகு பினராயி விஜயன் அங்கிருந்து சிறிது நேரத்தில் திருவனந்தபுரம் சென்றார்.
இதற்கிடையே தான் பினராயி விஜயனின் கான்வாய் வாகனங்கள் விபத்தில் சிக்கியது தொடர்பான வீடியோ வெளியாகி உள்ளது. அந்த வீடியோ மூலம் விபத்துக்கு ஸ்கூட்டி ஓட்டி சென்ற பெண் தான் காரணம் என்பது தெரியவந்துள்ளது. அதாவது கான்வாய் வாகனங்கள் வருவதற்கு முன்பு பெண் ஒருவர் ஸ்கூட்டியில் நடுரோட்டில் வந்து நிற்கிறார். அதன்பிறகு அவர் திடீரென்று சாலையின் குறுக்காக ஸ்கூட்டியை திருப்பி தான் செல்ல வேண்டிய இடத்துக்கு புறப்படுகிறார்.
இந்த வேளையில் மின்னல் வேகத்தில் வந்த கான்வாய் வாகனத்தின் டிரைவர் பெண் மீது மோதாமல் இருக்க திடீரென்று பிரேக் போடவே அடுத்தடுத்து பின்னால் வந்த வாகனங்கள் மோதி விபத்து என்பது ஏற்பட்டுள்ளது. பொதுவாக ஸ்கூட்டியில் பெண்கள் கவனமாக செல்கின்றனர். ஆனாலும் கூட சில பெண்கள் கவனக்குறைவாக சென்று விபத்தில் சிக்குவதும் நடக்கிறது. இதனை அடிக்கடி மீம்களாக்கி வலைதளங்களில் பரப்பபட்டு வருகின்றன. அதேபோல் வீடியோக்களும் வெளியாகி வருகின்றன.
அந்த வகையில் தற்போது பினராயி விஜயனின் கான்வாய் கார்கள் விபத்தில் சிக்கியது ஸ்கூட்டரில் சென்ற பெண் தான் காரணம் என்பதால் இதனை பார்க்கும் பலரும் ஒரு மாநில முதல்வராக இருந்தாலும் கூட ஸ்கூட்டி ஓட்டும் பெண்களிடம் தப்பிக்க முடியாது? என கூறி வருகின்றனர்.
Click it and Unblock the Notifications
Sign in with Google