நெல்லை சாந்தி ஸ்வீட்ஸ் அல்வா கடையில் வருமான வரி சோதனை நிறைவு! முக்கிய ஆவணங்கள் பறிமுதல்?

நெல்லை: நெல்லையில் சாந்தி ஸ்வீட்ஸ் அல்வா கடை தொடர்புடைய இடங்களில் வருமான வரித் துறை சோதனை நடத்தப்பட்ட நிலையில் அது தற்போது முடிந்துள்ளது. சோதனை நடந்த இடங்களில் எல்லாம் ஆவணங்களை மட்டுமே எடுத்துச் சென்றதாகவும் பணம் ஏதும் கைப்பற்றப்படவில்லை என்றும் தகவல்கள் வெளியாகின.

நெல்லை என்றால் தாமிரபரணி ஆற்று நீரில் செய்யப்படும் அல்வா ஃபேமஸ்! அங்கு சென்றால் அல்வா வாங்காமல் யாரும் வரமாட்டார்கள். நெல்லையப்பர் கோயில் அருகே இருட்டுக் கடை அல்வா இருப்பது போல் சாந்தி ஸ்வீட்ஸ் உள்ளது.

இங்கு சீக்கிரம் போய் கியூவில் நின்றால்தான் அல்வா கிடைக்கும். இல்லை என்றால் வெறுங்கையுடன் திரும்ப வேண்டியதுதான். ஜங்ஷன் பஸ் ஸ்டாண்டுக்கு பின்புறம் உள்ள சாந்தி ஸ்வீட்ஸ் கடை 24 மணி நேரமும் திறந்திருக்கும்.

இங்கு 3 ஷிப்டுகளில் ஊழியர்கள் பணியாற்றி வருகிறார்கள். நெல்லை புதிய பேருந்து நிலையம், ஜங்ஷனில் எண்ணற்ற சாந்தி ஸ்வீட்ஸ் கடை இருந்தாலும் எப்போதும் இந்த கடையில் கூட்டம் அதிகமாக இருக்கும்.

இந்த நிலையில் இந்த கடையில் வருமான வரித் துறை சோதனை நடத்தியது. இந்த சோதனை இன்றுடன் முடிந்தது. கடை, அல்வா தயாரிப்பு கூடம், அலுவலகம், உரிமையாளர் வீடுகளில் இந்த சோதனை நடத்தப்பட்டது. அப்போது சில முக்கிய ஆவணங்கள் கைப்பற்றப்பட்டன. பணம் எதுவும் கைப்பற்றப்படவில்லை என தகவல்கள் வெளியாகியுள்ளன.

இந்த சாந்தி ஸ்வீட்ஸ் அல்வா கடையில் கடந்த 2020 ஆம் ஆண்டு ஐடி ரெய்டு நடந்தது. அது போல் 2025 ஆம் ஆண்டு இந்த கடை அல்வாவில் தேள் இருந்ததாக புகார் எழுந்தது. இதுகுறித்து உணவு பாதுகாப்பு துறையினர் சோதனை நடத்தினர்.

அப்போது குடோனில் ஆய்வு மேற்கொண்டபோது சாந்தி ஸ்வீட்ஸ் கடை உரிமையாளர், "இங்கு தேள் வருவதற்கான வாய்ப்பு மிக மிக குறைவு. குடோனில் 100 டிகிரி செல்சியஸ் வரை வெப்பநிலை இருக்கும். இந்த வெப்பமான பகுதிக்கு பூச்சிகள் வருவதற்கான வாய்ப்பு குறைவு. இருந்தபோதிலும் இந்த விசாரணைக்கு முழு ஆதரவு அளிப்போம் என்று கூறியுள்ளார். மிகவும் புகழ்பெற்ற நெல்லை சாந்தி ஸ்வீட்ஸ் அல்வாவில் தேள் இருந்ததாக பரவும் வீடியோ அதிர்ச்சியையும் பரபரப்பையும் ஏற்படுத்தியது.

அண்மையில் சிலிண்டர் தட்டுப்பாட்டால் அல்வா விலையை சாந்தி ஸ்வீட்ஸ் ஏற்றியதாகவுமே் தகவல்கள் வெளியாகியிருந்தன. இந்த நிலையில் தற்போது மீண்டும் ரெய்டு நடத்தப்பட்டு அது முடிவடைந்தது.