கொடைக்கானல் டூர் போக பிளான் பண்றீங்களா.. இங்க மட்டும் போக முடியாது.. வனத்துறை முக்கிய அறிவிப்பு

திண்டுக்கல்: யானை நடமாட்டம் அதிகமாக இருப்பதால் திண்டுக்கல் மாவட்டம் கொடைக்கானலில் உள்ள பேரிஜம் ஏரிக்கு செல்ல சுற்றுலாப்பயணிகளுக்கு தற்காலிக தடை விதிக்கப்பட்டுள்ளது.

சர்வதேச சுற்றுலா தலமான கொடைக்கானலில் எந்த பகுதிக்கும் போய் சுற்றி பார்க்கலாம்.. ஆனால் பேரிஜம் ஏரிக்கு போவதற்கு மட்டும் அவ்வளவு எளிதில் முடியாது.. வனத்துறையிடம் அனுமதி வாங்க வேண்டும்.. பேரிஜம் ஏரி மிக அற்புதமான வனப்பகுதியாகும். அந்த காலத்தில் மூணாறு செல்ல எஸ்கேப் சாலை இருந்த பகுதியாகும்.

இங்கு அரிய வகை வனவிலங்குகள், யானைகள், சிறுத்தை, புலி, காட்டு மாடு, நரி உள்ளிட்ட பல்வேறு வனவிலங்குகள் உள்ளன. இதேபோல் அரிய வகை தாவரங்களும் இருக்கின்றன. இங்கு சுற்றி பார்க்க ஏராளமான கட்டுப்பாடுகள் உள்ளன. பேரிஜம் ஏரிக்கு செல்ல வனத்துறையிடம் சிறப்பு அனுமதி பெற வேண்டும்.. அனுமதி பெற்றே சுற்றுலா பயணிகள் தற்போது வரை சென்று வருகிறார்கள்.

இந்த சூழலில் கடந்த சில மாதங்களாக யானைகள் இந்த பகுதியில் முகாமிட்டிருந்ததால் சுற்றுலா பயணிகள் பேரிஜம் பகுதிக்கு செல்ல வனத்துறையினர் தடை விதித்திருந்தனர். முகாமிட்டிருந்த யானைகளை அடர்ந்த வனப்பகுதிக்கு வனத்துறையினர் விரட்டியடித்தனர்.

இதையடுத்து, சுற்றுலா பயணிகளுக்கு மீண்டும் அனுமதி வழங்கப்பட்டுள்ளது. இந்நிலையில் நேற்று முன் தினம், பேரிஜம் வனப்பகுதிக்கு சென்று வந்த சுற்றுலா பயணிகள், யானைகள் கூட்டத்தை படம்பிடித்து சமூக வலைதளத்தில் பதிவிட்டார்கள். இதையடுத்து பேரிஜம் வனப்பகுதியை வனத்துறையினர் தீவிரமாக கண்காணித்து வந்தார்கள். இதனிடையே பேரிஜம் வனப்பகுதியை தற்காலிகமாக மூடுவது குறித்து ஆலோசித்து வந்தனர்.

இதுகுறித்து வனத்துறை ரேஞ்சர் செந்தில்குமார் நேற்று கூறுகையில், 'பேரிஜம் வனப்பகுதியில் யானைகள் நடமாட்டம் உள்ளதாக தகவல் கிடைத்ததையடுத்து வனத்துறை அலுவலர்கள் மற்றும் பணியாளர்கள் தீவிரமாக கண்காணித்து வருகிறோம். தொடர்ந்து யானைகள் நடமாட்டம் இருந்தால், சுற்றுலா பயணிகளின் பாதுகாப்பு கருதி பேரிஜம் வனப்பகுதி தற்காலிகமாக மூடப்படும் என்று கூறியிருந்தார். இதையடுத்து யானை நடமாட்டம் அதிகமாக இருப்பதால திண்டுக்கல் மாவட்டம் கொடைக்கானலில் உள்ள பேரிஜம் ஏரிக்கு செல்ல சுற்றுலாப்பயணிகளுக்கு தற்காலிக தடை விதித்து உத்தரவிடப்பட்டுள்ளது..

English summary

Tourists have been temporarily banned from visiting Berijam Lake in Kodaikanal, Dindigul district due to high elephant traffic.