6வது ரவுண்டு மழை.. இன்று தமிழ்நாட்டில் தொடங்குது! அடுத்த 4 நாட்கள் கனமழை வெளுத்து வாங்கப்போகுது

சென்னை: தமிழ்நாட்டில் 6 வது சுற்று மழை இன்று தொடங்கப்போவதாகவும், அடுத்த 4 நாட்கள் கனமழைக்கு வாய்ப்பு உள்ளதாகவும் தனியார் வானிலை ஆய்வாளர் ஹேமச்சந்தர் தெரிவித்து உள்ளார்.

இதுகுறித்து அவர் தெரிவித்து உள்ளதாவது, "இன்று (24.12.2023) முதல் பனிப்பொழிவும், குளிரும் படிப்படியாக குறையும். டெல்டா மாவட்டங்களான மயிலாடுதுறை, காரைக்கால், நாகப்பட்டினம், திருவாரூர் மாவட்டங்களில் மிதமானது முதல் சற்றே கனமழை பதிவாகும். கடலோரத்தின் ஒரிரு இடங்களில் கனமழை பதிவாக கூடும் இன்று முற்பகலில் மழை டெல்டாவில் படிப்படியாக துவங்கும். தமிழகத்தின் பிற கடலோர மாவட்டங்களில் ஆங்காங்கே மழை எதிர்ப்பார்க்கலாம்.

டிசம்பர் 24 முதல் 27 வரை 4 நாட்களுக்கு 6 ஆம் சுற்று வடகிழக்கு பருவமழை தமிழகத்தின் கடலோர மாவட்டங்களில் பரவலாக பல இடங்களில் சற்றே கனமழை முதல் கனமழையை கொடுக்கும். டிசம்பர் 28 ம் தேதி முதல் 31 ஆம் தேதி பருவமழை தீவிரமடைந்து தமிழகத்தின் கடலோர மாவட்டங்களில் மிககனமழை வரை கொடுக்கும்.

தமிழகத்தின் மேற்கு தொடர்ச்சி மலை மாவட்டங்களான திருநெல்வேலி, தென்காசி, தேனி, விருதுநகர், நீலகிரி, கோயம்புத்தூர் மாவட்டங்களின் மேற்குதொடர்ச்சி மலை பகுதிகளில் டிசம்பர் 29, 30 ஆகிய தேதிகளில் அதித கனமழைக்கு வாய்ப்பு உள்ளது." என்று குறிப்பிட்டு உள்ளார்.

முன்னதாக வானிலை மையம் வெளியிட்ட அறிவிப்பில், "இந்தியப் பெருங்கடல் மற்றும் அதை ஒட்டிய தென் மேற்கு வங்கக் கடல் பகுதிகளில் ஒரு வளி மண்டல கீழடுக்கு சுழற்சி நிலவுகிறது. இன்று தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக் கூடும். 25.12.2023 முதல் 28.12.2023 வரை: தமிழகத்தில் ஒரு சில இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக் கூடும். 29.12.2023: தென் தமிழகத்தில் ஒரு சில இடங்களிலும், வட தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக் கூடும்.

சென்னை மற்றும் புறநகர் பகுதிகளுக்கான வானிலை முன்னறிவிப்பு: அடுத்த 24 மணி நேரத்திற்கு வானம் ஓரளவு மேகமூட்டத்துடன் காணப்படும். அதிகபட்ச வெப்ப நிலை 30 - 31 டிகிரி செல்சியஸ் மற்றும் குறைந்தபட்ச வெப்பநிலை 21 - 22 டிகிரி செல்சியஸை ஒட்டியும் இருக்கக்கூடும். நகரின் ஒருசில பகுதிகளில் அதிகாலை வேளையில் லேசான பனி மூட்டம் காணப்படும்.

அடுத்த 48 மணி நேரத்திற்கு வானம் ஓரளவு மேக மூட்டத்துடன் காணப்படும். நகரின் ஒருசில பகுதிகளில் லேசான மழை பெய்யக்கூடும். அதிகபட்ச வெப்பநிலை 30 - 31 டிகிரி செல்சியஸ் மற்றும் குறைந்தபட்ச வெப்பநிலை 21 - 22 டிகிரி செல்சியஸாகவும் இருக்கக்கூடும். கடந்த 24 மணி நேரத்தில் பதிவான மழை அளவு (சென்டி மீட்டரில்): ஏதுமில்லை. மேலும் விவரங்களுக்கு: mausam.imd.gov.in/chennai இணையதளத்தை காணவும்." என்று குறிப்பிட்டு இருந்தது.

English summary

Private meteorologist Hemachander has informed that the 6th round of rain will begin in Tamil Nadu today and there is a possibility of heavy rain for the next 4 days.