நெருங்கும் காற்றழுத்த தாழ்வு பகுதி.. சென்னையில் இன்று இடி - மின்னலுடன் மழை பெய்யும் - வானிலை மையம்
சென்னை: வங்கக்கடலில் நிலவும் ஆழ்ந்த காற்றழுத்த தாழ்வு பகுதி இன்று தென்மேற்கு வங்கக்கடல் பகுதிகளிலும், வடதமிழகம் மற்றும் தெற்கு ஆந்திர கடலோர பகுதிகளின் அருகே நிலவும். இதனால் சென்னையில் இன்று இடி - மின்னலுடன் மழை பெய்ய வாய்ப்புள்ளது என்று தெரிவிக்கப்பட்டுள்ளது. அதேபோல் தமிழகத்தின் வானிலை நிலவரம் எப்படி இருக்கும்? என்றும் முக்கிய தகவல் வெளியாகி உள்ளது.
வங்கக்கடலில் நிலவும் ஆழ்ந்த காற்றழுத்த தாழ்வு பகுதி நேற்று முன்தினம் மேற்கு திசையில் நகர்ந்தது. இது நேற்று காலை 8.30 மணியளவில் தென்மேற்கு மற்றும் அதனையொட்டி மத்திய மேற்கு வங்கக்கடல் பகுதிகளில், தெற்கு ஆந்திர -வடதமிழக கடலோர பகுதியில் நிலவுகிறது.
இது மேலும் மேற்கு - தென்மேற்கு திசையில் நகர்ந்து இன்று தென்மேற்கு வங்கக்கடல் பகுதிகளிலும், வடதமிழகம் மற்றும் தெற்கு ஆந்திர கடலோர பகுதிகளின் அருகேயும் நிலவக்கூடும்.
இதன் காரணமாக இன்று வடகடலோர தமிழகத்தில் ஒரு சில இடங்களிலும், இதர தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும். அதிகாலை வேளையில் உள்தமிழகத்தில் ஓரிரு இடங்களில் லேசான பனிமூட்டம் காணப்படும்.
நாளை வடதமிழகத்தில் அநேக இடங்களிலும், தென்தமிழகத்தில் ஓரிருஇடங்களிலும், புதுவை மற்றும் காரைக்கால்பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். அதன்பிறகு நாளை மறுநாள் (டிசம்பர் 26) தமிழகத்தில் அநேக இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும்.
டிசம்பர் 27 ம் தேதி தமிழகத்தில் ஒரு சில இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும். மேலும் சென்னை மற்றும் புறநகர் பகுதிகளை பொறுத்தவரை இன்று வானம் ஓரளவு மேகமூட்டத்துடன் காணப்படும். நகரின் ஒரு சில பகுதிகளில் இடி, மின்னலுடன் கூடிய லேசான/மிதமான மழை பெய்யக்கூடும். அதிகபட்ச வெப்பநிலை 30 டிகிரி செல்சியஸ் முதல் 31 டிகிரி செல்சியஸையொட்டி இருக்கும். குறைந்தபட்ச வெப்பநிலை 23-24 டிகிரி செல்சியஸையொட்டி இருக்கும்.
இந்த ஆழ்ந்த காற்றழுத்த தாழ்வு பகுதி காரணமாக தமிழக கடலோரப்பகுதிகளில் இன்றும், நாளையும் வடதமிழக கடலோர பகுதிகளிலும் சூறாவளிக்காற்று மணிக்கு 35 முதல் 45 கிலோமீட்டர் வேகத்திலும், இடையிடையே 55 கிலோமீட்டர் வேகத்திலும் வீசக்கூடும். அதன்பிறகு டிசம்பர் 26, 27 தேதிகளில் மீனவர்களுக்கு எந்த எச்சரிக்கையும் இல்லை.
அதேவேளையில் வங்கக்கடல் பகுதியை எடுத்து கொண்டால் இன்று மற்றும் நாளை என்று 2 நாட்கள் தெற்கு ஆந்திர கடலோரப்பகுதிகள், மத்திய மேற்கு வங்கக்கடல் மற்றும் அதனையொட்டி தென்மேற்கு வங்கக்கடல் பகுதிகளில் சூறாவளிக்காற்று மணிக்கு 35 முதல் 45 கிலோமீட்டர் வேகத்திலும், இடையிடையே 55 கிலோமீட்டர் வேகத்திலும் வீசக்கூடும். இதனால் இந்த பகுதிகளுக்கு மீனவர்கள் செல்ல வேண்டாம் என்று சென்னை வானிலை ஆய்வு மையம் தெரிவித்துள்ளது.
Click it and Unblock the Notifications
Sign in with Google