ஆவடியில் பேய் மழை! ஒரே நாளில் இவ்வளவு செ.மீ. மழையா! வளசரவாக்கத்தை விட மோசம் போலயே!

சென்னை: ஆவடியில் கடந்த 24 மணி நேரத்தில் மிக கனமழை பெய்துள்ளதாக தமிழ்நாடு பேரிடர் மேலாண்மை துறை தெரிவித்துள்ளது.

வங்கக் கடலில் நிலவி வரும் மிக்ஜாம் புயல் புதுச்சேரிக்கு கிழக்கு- வடகிழக்கே சுமார் 210 கிலோமீட்டர் தொலைவிலும் சென்னைக்கு கிழக்கு- தென்கிழக்கே சுமார் 150 கிலோமீட்டர் தொலைவிலும் நிலை கொண்டுள்ளது.

இது வடக்கு-வடமேற்கு திசையில் நகர்ந்து இன்று பிற்பகல் மத்தியமேற்கு வங்கக் கடல் பகுதிகளில் வரக் கூடும். தெற்கு ஆந்திரா மற்றும் அதனை ஒட்டிய வடதமிழக கடலோரப் பகுதிகளில் நிலவக்கூடும். தெற்கு ஆந்திரா கடலோரப் பகுதிகளை ஒட்டி வடக்கு திசையில் நகரும்.

நாளை காலை தெற்கு ஆந்திரா கடற்கரை நெல்லூருக்கும் மசூலிபட்டினத்திற்கும் இடையே தீவிர புயலாக கடக்கக் கூடும் என வானிலை ஆய்வு மையம் தெரிவித்துள்ளது. இந்த புயல் கரையை நெருங்கி வருவதால் சென்னையில் விடிய விடிய சூறைக் காற்றுடன் கனமழை பெய்து வருகிறது. கடந்த 24 மணி நேரத்தில் சென்னையில் அதிகபட்சமாக வளசரவாக்கம் மற்றும் மீனம்பாக்கத்தில் தலா 20 செ.மீ. மழை பதிவாகியுள்ளது.

சோழிங்கநல்லூர், பெருங்குடி, கோடம்பாக்கத்தில் தலா 18 சென்டி மீட்டர் மழைப்பொழிந்துள்ளது. மதுரவாயல், கத்திவாக்கம், அம்பத்தூர், மீனம்பாக்கம் பகுதிகளிலும் 12 சென்டிமீட்டர் மழை பெய்துள்ளது. சென்னை புறநகர் பகுதிகளில் எல்லாம் குறைந்த நேரத்தில் அதிக மழை பொழிவை கொடுத்துள்ளது.

இதே போன்று, மீனம்பாக்கம், நுங்கம்பாக்கம் பகுதிகளில் மணிக்கு 40 கிலோ மீட்டர் வேகத்தில் சூறைக்காற்று வீசியது. சென்னை எண்ணூரில் மணிக்கு 70 கி.மீ., வேகத்தில் சூறைக்காற்று வீசியது. மிக்ஜாம் புயல் பழவேற்காட்டில் இருந்து 140 கி.மீ. தொலைவில் உள்ளது. இடைவிடாமல் மழை கொட்டி வருகிறது.

ஆவடியில் மிக கனமழை கொட்டி வருகிறது. நேற்று காலை 6 மணி முதல் இன்று காலை 6 மணி வரையிலான நிலவரத்தை பார்த்தோமேயானால் ஆவடியில் மட்டும் 278.50 மி.மீ. மழை பெய்துள்ளது. இது எக்ஸ்ட்ரீம் மழை பெய்து வருகிறது. தாமரைப்பாக்கத்தில் 163 மி.மீ மழை பெய்துள்ளது.

அது போல் கும்மிடிப்பூண்டி அருகே கனமழை பெய்ததால் 153 மிமீ மழை பெய்துள்ளது. கூவம் ஆற்றுக்கு ஏராளமான நீர் வரத்து வரும் என தெரிகிறது. வளசரவாக்கத்தில் 203.1 மி,மீ, மழை பெய்துள்ளது. அண்ணாநகர் மேற்கு பகுதியில் 194.7 மி.மீ. மழை பெய்துள்ளது. மடிப்பாக்கத்தில் 189.3 மி.மீ. மழை பெய்துள்ளது.

English summary

Cyclone Michaung: Avadi got very extreme rainfall for 24 hours.