கோவை, நீலகிரி, சேலம் உள்பட 7 மாவட்டங்களில் இன்று கனமழைக்கு வாய்ப்பு.. வானிலை மையம் அலர்ட்

சென்னை: தமிழகத்தில் இன்று 7 மாவட்டங்களில் கனமழை பெய்ய வாய்ப்பு உள்ளதாக வானிலை ஆய்வு மையம் தெரிவித்து உள்ளது. கோவை, நீலகிரி, திருப்பத்தூர், ஈரோடு உள்ளிட்ட 7 மாவட்டங்களில் கனமழைக்கு வாய்ப்பு இருப்பதாகவும், சென்னையில் அடுத்த 24 மணி நேரத்திற்கு வானம் மேகமூட்டத்துடன் காணப்படும் என்றும் வானிலை மையம் தெரிவித்துள்ளது.

தென் மாவட்டங்களில் கடந்த ஒரு வாரத்திற்கு முன்பு வெயிலின் தாக்கம் அதிகமாக இருந்தது. ஆனால் கடந்த 2 நாட்களாக தென் மாவட்டங்களில் மழை வெளுத்து வாங்கி வருகிறது. நேற்று முன் தினம் நெல்லை, தூத்துக்குடி, தென்காசி உள்ளிட்ட மாவட்டங்களில் இடி மின்னலுடன் கனமழை கொட்டித்தீர்த்தது. நேற்றும் ஒருசில இடங்களில் மழை பெய்தது. தென்காசி மாவட்டத்தில் 2 நாட்களாக பெய்து வரும் மழையால் நீர் நிலைகளில் தண்ணீர் மட்டம் உயர்ந்து வருகிறது.

தூத்துக்குடி மாவட்டத்தில் சூறாவளி காற்றுடன் மழை பெய்தது. சிங்கித்துறை கடற்கரையில் 200க்கு மேற்பட்ட மீன்வளக் கூடங்கள் சேதமடைந்தன. மேலும் சூறாவளி காற்றினால் வீட்டின் மெற்கூரைகளும் சேதமடைந்தன. இதேபோன்று நீலகிரி, கோவை, ஈரோடு மாவட்டங்களிலும் நேற்று ஒருசில இடங்களில் மழை பெய்து வருகிறது. இந்த நிலையில் இன்றும் தமிழகத்தில் பல்வேறு இடங்களில் மழைக்கு வாய்ப்பு உள்ளதாக சென்னை வானிலை மையம் தெரிவித்துள்ளது.

அதன்படி இன்று தமிழகத்தில் 7 மாவட்டங்களில் கனமழை பெய்ய வாய்ப்பு உள்ளதாக சென்னை வானிலை மையம் தெரிவித்துள்ளது. வானிலை மையம் வெளியிட்டுள்ள அறிவிப்பில், தமிழகத்தில் இன்று ஈரோடு, கோவை, சேலம், நீலகிரி, கிருஷ்ணகிரி, தர்மபுரி, திருப்பத்தூர் மாவட்டங்களில் இன்று கனமழை பெய்ய வாய்ப்பு உள்ளதாக கூறப்பட்டுள்ளது.

குமரிக்கடல் மற்றும் தமிழக பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. இதன் காரணமாக இன்று தென் தமிழகத்தில் அநேக இடங்களிலும் வட தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்ய வாய்ப்பு உள்ளது.

சென்னையை பொறுத்தவரை அடுத்த 24 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி, மின்னலுடன் கூடிய லேசானது/மிதமான மழை பெய்ய வாய்ப்புள்ளது. அதிகபட்ச வெப்பநிலை 34-35° செல்சியஸை ஒட்டியும், குறைந்தபட்ச வெப்பநிலை 26-27° செல்சியஸை ஒட்டியும் இருக்கக்கூடும்" என்று கூறப்பட்டுள்ளது.

English summary

The Meteorological Department has informed that there is a possibility of heavy rain in 7 districts of Tamil Nadu today. Heavy rains are likely in 7 districts including Coimbatore, Nilgiris, Tirupattur, Erode and Chennai will remain cloudy for the next 24 hours, the Meteorological Department said.