மறையுது மழை.. படருது பனி.. என்ன நடக்கும் இனி? ஒரு வாரம் தமிழக வானிலை இதான்! சென்னையில் என்ன ஸ்பெஷல்?

சென்னை: தமிழ்நாட்டில் அடுத்த ஒரு வாரம் ஓரிரு இடங்களில் மழைக்கு வாய்ப்பு இருப்பதாகவும், பனி மூட்டம் அதிகரிக்கும் எனவும் சென்னை வானிலை ஆய்வு மையம் தெரிவித்து இருக்கிறது.

இது குறித்து வெளியிட்டு உள்ள அறிவிப்பில், "நேற்று டிசம்பர் 30 ஆம் தேதி தென் கிழக்கு அரபிக்கடல் மற்றும் அதனை ஒட்டி அமைந்து இருக்கும் பகுதிகளில் உருவான காற்றழுத்த தாழ்வுப் பகுதி இன்று அதே பகுதிகளில் நிலவி வருகிறது. அடுத்த 48 மணி நேரத்தில் இந்த காற்றழுத்த தாழ்வுப் பகுதி மேற்கு - வடமேற்கு திசையில் நகர்ந்து ஆழ்ந்த காற்றழுத்த தாழ்வுப் பகுதியாக தெற்கு அரபிக் கடல் மத்திய பகுதிகளில் நிலவக்கூடும்.

இன்று தமிழ்நாட்டில் ஓரிரு இடங்களிலும், புதுச்சேரி மற்றும் காரைக்கால் ஆகிய பகுதிகளிலும் லேசானது முதல் மிதமான மழை பெய்யலாம்.

தமிழ்நாட்டில் ஓரிரு இடங்களில் அதிகாலை நேரம் லேசான பனி மூட்டத்திற்கு வாய்ப்பு உள்ளது. இரவு நேரங்களில் ஓரிரு இடங்களில் நீலகிரி மாவட்டத்தின் மலைப் பகுதிகளில் உறை பனிக்கு வாய்ப்பு உள்ளது.

நாளை தமிழ்நாட்டின் ஓரிரு இடங்களிலும், புதுச்சேரி மற்றும் காரைக்கால் ஆகிய பகுதிகளிலும் லேசானது முதல் மிதமான மழை பெய்யக்கூடும். தமிழகத்தில் ஓரிரு இடங்களில் அதிகாலை நேரத்தில் லேசான பனி மூட்டத்திற்கு வாய்ப்பு இருக்கிறது. ஜனவரி 2 ஆம் தேதி முதல் ஜனவரி 6 ஆம் தேதி வரை தமிழ்நாட்டின் ஓரிரு இடங்களிலும், புதுச்சேரி மற்றும் காரைக்கால் பகுதிகளிலும் லேசானது முதல் மிதமான மழை பெய்ய வாய்ப்புகள் உள்ளன.

சென்னை மற்றும் புறநகர் பகுதிகளுக்காக வானிலை மையம் வெளியிட்டு இருக்கும் வானிலை முன்னறிவிப்பில், அடுத்த 48 மணி நேரம் வானம் ஓரளவு மேகமூட்டத்துடன் காணப்படும். அதிகாலை சமயத்தில் லேசான பனி மூட்டத்திற்கு வாய்ப்பு உள்ளது. அதிகபட்ச வெப்பநிலை 31 டிகிரி செல்சியஸ் என்ற அளவிலும் குறைந்தபட்ச வெப்பநிலை 21 முதல் 22 டிகிரி செல்சியஸ் என்ற அளவில் இருக்கக்கூடும்.

கடந்த 24 மணி நேரத்தில் பதிவான மழை அளவை பொருத்தவரை ஊத்து (திருநெல்வேலி), நாலுமுக்கு (திருநெல்வேலி) தலா 3 சென்டி மீட்டர், காக்காச்சி (திருநெல்வேலி), மாஞ்சோலை (திருநெல்வேலி) தலா 2 சென்டி மீட்டர், ராமநதி அணைப் பகுதி (தென்காசி) தலா 1 சென்டி மீட்டர். என்ற அளவிலும் மழை கொட்டி உள்ளது." என்று குறிப்பிடப்பட்டு உள்ளது.

English summary

Chennai Meteorological Department has informed that there is a chance of rain at one or two places in Tamil Nadu for the next week and snow fog will increase.