கொளுத்தும் வெயில்.. சூட்டை தணிக்க வரும் மழை.. தென் தமிழகத்திற்கு "ஜில்" அப்டேட் கொடுத்த வானிலை மையம்

சென்னை: தென் தமிழகத்தில் இன்று லேசான மழை பெய்ய வாய்ப்பு இருப்பதாக சென்னை வானிலை ஆய்வு மையம் தெரிவித்துள்ளது. இதேபோல், வரும் 2 ஆம் தேதி முதல் 3 ஆம் தேதி வரை தென்தமிழகத்தில் ஓரிரு இடங்களில் லேசானது முதல் மிதமான மழை பெய்யக்கூடும் என்று வானிலை மையம் தெரிவித்துள்ளது.

தமிழகத்தில் வெயில் கொளுத்தி எடுக்கிறது. வெப்பநிலையால் தற்போதே கோடைக்காலம் போல வெயில் சுட்டெரிக்கிறது. நேற்று தமிழகத்தின் கடலோர மாவட்டங்களில் லேசான மழை பெய்தது. குறிப்பாக ராமநாதபுரம் மாவட்டத்தில் நேற்று லேசான மழை பெய்தது. ராமநாதபுரம் மாவட்டத்தில் 1 செ. மீ மழை பெய்தது.

எனினும் வடதமிழகத்தில் வறண்ட வானிலையே நிலவி வருகிறது. இந்த நிலையில் தென் தமிழகத்தில் இன்று ஒருசில இடங்களில் லேசான மழைக்கு வாய்ப்பு இருப்பதாக சென்னை வானிலை ஆய்வு மையம் தெரிவித்துள்ளது. இது தொடர்பாக வானிலை மையம் வெளியிட்டுள்ள அறிவிப்பில் கூறப்பட்டிருப்பதாவது:-

இன்று மழைக்கு வாய்ப்பு:

28.03.2024: தென்தமிழகத்தில் ஓரிரு இடங்களில் லேசானது முதல் மிதமான மழை பெய்யக்கூடும். வட தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும்.

29.03.2024 முதல் 01.04.2024 வரை; தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும்.

02.04.2024 மற்றும் 03.04.2024: தென்தமிழகத்தில் ஓரிரு இடங்களில் லேசானது முதல் மிதமான மழை பெய்யக்கூடும். வட தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும்.

அதிகபட்ச வெப்பநிலை பற்றிய முன்னறிவிப்பு:

28.03.2024 முதல் 01.04.2024 வரை: தமிழகத்தில் ஓரிரு இடங்களில் அதிகபட்ச வெப்பநிலை அடுத்த ஐந்து தினங்களில் 2 டிகிரி செல்சியஸ் வரை படிப்படியாக அதிகரிக்கக்கூடும். அதிக வெப்பநிலை மற்றும் அதிக ஈரப்பதம் இருக்கும் பொழுது ஒரிரு இடங்களில் அசௌகரியம் ஏற்படலாம்.

சென்னையில் எப்படி?:

சென்னை மற்றும் புறநகர் பகுதிகளுக்கான வானிலை முன்னறிவிப்பினை பொறுத்தவர, அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 34 - 35 டிகிரி செல்சியஸை ஒட்டியும், குறைந்தபட்ச வெப்பநிலை 25 - 26 டிகிரி செல்சியஸை ஒட்டியும் இருக்கக்கூடும்.

மழை அளவு: கடந்த 24 மணி நேரத்தை பொறுத்தவர தமிழகத்தில் ராமநாதபுரம் மாவட்டத்தில் 1 செ.மீ மழை பதிவாகியுள்ளது. மீனவர்களுக்கான எச்சரிக்கை எதுவுமில்லை. இவ்வாறு அதில் கூறப்பட்டுள்ளது.

English summary

The Chennai Meteorological Department has said that there is a possibility of light rain in South Tamil Nadu today. Similarly, from the 2nd to the 3rd, light to moderate rain may occur at one or two places in the south-east, according to the Meteorological Department.