கொளுத்தும் வெயிலுக்கு இடையே.. தென் மாவட்டங்களில் இன்று மழைக்கு வாய்ப்பு! ஜில் அப்டேட் கொடுத்த வானிலை

சென்னை: தமிழகத்தில் வெப்ப நிலை இயல்பை விட அதிகமாக இருந்து வரும் நிலையில், இன்று தென் மாவட்டங்களில் லேசான மழைக்கு வாய்ப்பு இருப்பதாக சென்னை வானிலை ஆய்வு மையம் தெரிவித்துள்ளது.

தமிழகத்தில் வடகிழக்கு பருவமழை இயல்பை விட அதிகமாகவே பெய்தது. அதிலும் சென்னை, திருவள்ளூர், காஞ்சிபுரம் மற்றும் தென் மாவட்டங்களில் பெய்த மழை அனைவரையும் மறக்க முடியாதபடி செய்தது. தற்போது தமிழகத்தில் வெப்பநிலை அதிகரித்து வருகிறது. கோடைக்காலம் ஆரம்பிக்கும் முன்பாகவே சில இடங்களில் வெயில் வெளுத்து வாங்குகிறது.

பகல் நேரங்களில் அதிகரிக்கும் உஷ்ணத்தால், இப்பவே கத்திரி வெயில் காலம் போல இருக்கிறதே என மக்கள் நினைக்கும் அளவுக்கு வெயில் வாட்டி வதைக்க ஆரம்பித்துவிட்டது. இந்த நிலையில், தென் மாவட்டங்களில் இன்று லேசான மழைக்கு வாய்ப்பு இருப்பதாக சென்னை வானிலை ஆய்வு மையம் தெரிவித்து உள்ளது.

தென் மாவட்டங்களில் மழைக்கு வாய்ப்பு: இது தொடர்பாக சென்னை வானிலை ஆய்வு மையம் தெரிவித்து இருப்பதாவது:- தென் தமிழகத்தில் இன்று ஓரிரு இடங்களில் லேசான மழை பெய்ய வாய்ப்புள்ளது. வட தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும். ஓரிரு இடங்களில் அதிகபட்ச வெப்பநிலை இயல்பை விட 2 முதல் 3 டிகிரி செல்சியஸ் அதிகமாக இருக்கக்கூடும். உள்தமிழகத்தில் ஓரிரு இடங்களில் அதிகாலை வேளையில் லேசான பனிமூட்டத்திற்கு வாய்ப்புள்ளது.

நாளையும் மழைக்கு வாய்ப்பு: இதேபோல் நாளை 23. 02. 2024 தென்தமிழக மாவட்டங்கள் மற்றும் வடதமிழக கடலோர மாவட்டங்களில் ஒரிரு இடங்களிலும், புதுவை மற்றும் காரைக்கால் பகுதிகளிலும் லேசான மழை பெய்ய வாய்ப்புள்ளது. வடதமிழக உள்மாவட்டங்களில் வறண்ட வானிலை நிலவக்கூடும்.

நாளை மறுநாள் 24. 02. 2024 மற்றும் 25. 02. 2024 தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசான மழை பெய்ய வாய்ப்புள்ளது. 26. 02. 2024 மற்றும் 27. 02. 2024 தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும்.

சென்னையில் எப்படி?: சென்னையை பொறுத்தவரை இன்று வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 32 - 33 டிகிரி செல்சியஸை ஒட்டியும், குறைந்தபட்ச வெப்பநிலை 22 - 23 டிகிரி செல்சியஸை ஒட்டியும் இருக்கக்கூடும். இவ்வாறு அதில் கூறப்பட்டுள்ளது.

English summary

As the temperature in Tamil Nadu is higher than normal, there is a chance of light rain in the southern districts today, according to the Chennai Meteorological Department.