கொளுத்தும் வெயிலுக்கு இன்று லீவு! இடி, மின்னலுடன் சென்னையில் கொட்டப்போகும் மழை.. வானிலை மையம் அலர்ட்

சென்னை: தமிழகத்தில் இன்று ஒருசில இடங்களில் இடி மின்னலுடன் மழைக்கு வாய்ப்பு உள்ளது என்றும் குறிப்பாக தலைநகர் சென்னையில் இன்று இடியுடன் கூடிய லேசானது முதல் மிதமான மழைக்கு வாய்ப்பு உள்ளதாகவும் சென்னை வானிலை ஆய்வு மையம் கூறியுள்ளது. இதேபோன்று தமிழகத்தில் இன்றும், நாளையும் அதிகபட்ச வெப்பநிலையில் மாற்றத்திற்கான வாய்ப்பு குறைவு என்றும் தெரிவித்துள்ளது.

தமிழகத்தில் நேற்று முன் தினம் இரவு முதல் பல்வேறு மாவட்டங்களில் கனமழை கொட்டி தீர்த்தது. காலையில் இருந்து மதியம் வரை வெயில் சுட்டெரித்து வந்த நிலையில், திடீரென மாலை நேரத்தில் கிளைமேட் மாறி மழை வெளுத்து வாங்க தொடங்கியது. குறிப்பாக விருதுநகர் மாவட்டத்தில் மூன்றரை மணி நேரத்தில் 7 செமீ அளவுக்கு மழை கொட்டி தீர்த்தது. இதனால் தூத்துக்குடியில் பல்வேறு நகரங்கள் வெள்ளக்காடாகின.

வளிமண்டல கீழடுக்கு சுழற்சி

இதேபோன்று தேனி, கோவை, திருப்பூர், திண்டுக்கல், விருதுநகர், தென்காசி, குமரி ஆகிய மாவட்டங்களிலும் ஒரு சில இடங்களில் நேற்று கனமழை கொட்டி தீர்த்தது. கிருஷ்ணகிரி, தர்மபுரி மாவட்டங்களிலும் ஒரு சில இடங்களில் மழை வெளுத்து வாங்கியது. இந்த நிலையில் தமிழத்தில் இன்றும் ஒருசில இடங்களில் இடி மின்னலுடன் கூடிய லேசானது முதல் மிதமான மழையும், சென்னையிலும் மழைக்கு வாய்ப்பு உள்ளதாக வானிலை ஆய்வு மையம் கூறியுள்ளது.

இது தொடர்பாக வானிலை மையம் வெளியிட்டிருந்த அறிவிப்பில் கூறப்பட்டிருப்பதாவது:- "வடக்கு உள் கர்நாடகா முதல் தென்தமிழகம் வரை ஒரு வளி மண்டல கீழடுக்கு சுழற்சி நிலவுகிறது. எனவே இன்று தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய, லேசானது முதல் மிதமான மழை பெய்யக்கூடும். நாளை 24 ஆம் தேதி தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய, லேசானது முதல் மிதமான மழை பெய்யக்கூடும்.

சென்னையில் இன்று மழைக்கு வாய்ப்பு

வரும் 25, 26 ஆம் தேதிகளில் தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும். 27 மற்றும் 28 ஆம் தேதிகளில் தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும், லேசானது முதல் மிதமான மழை பெய்யக்கூடும். அதிகபட்ச வெப்பநிலையை பொறுத்தவரை இன்றும் நாளையும் தமிழகத்தில் அதிகபட்ச வெப்பநிலையில் பொதுவாக பெரிய மாற்றத்திற்கான வாய்ப்பு குறைவு.

சென்னையை பொறுத்தவரை இன்று வானம் ஓரளவு மேகமூட்டத்துடன் காணப்படும். ஒருசில பகுதிகளில் இடி, மின்னலுடன் கூடிய, லேசான/மிதமான மழை பெய்ய வாய்ப்புள்ளது. அதிகபட்ச வெப்பநிலை 34-35° செல்சியஸை ஒட்டியும், குறைந்தபட்ச வெப்பநிலை 27-28° செல்சியஸை ஒட்டியும் இருக்கக்கூடும்.

அதிகபட்ச வெப்பநிலை

வரும் 24 முதல் 26 ஆம் தேதி வரை தமிழகத்தில் அதிகபட்ச வெப்பநிலை ஓரிரு இடங்களில் அதிகபட்ச வெப்பநிலை படிப்படியாக 2-3° செல்சியஸ் உயரக்கூடும். இன்று தொடங்கி 26 வரை தமிழகத்தில் அதிகபட்ச வெப்பநிலை ஓரிரு இடங்களில் இயல்பை விட 2-3° செல்சியஸ் அதிகமாக இருக்கக்கூடும்.

அதேபோல இன்று அதிக வெப்பநிலையும், அதிக ஈரப்பதமும், குறைந்தபட்ச வெப்பநிலை ஒருசில இடங்களில் இயல்பை விட 2-4° செல்சியஸ் அதிகமாகவும் இருக்கும் நிலையில், தமிழகத்தில் ஓரிரு பகுதிகளில் அசௌகரியம் ஏற்படலாம். மீனவர்களுக்கான எச்சரிக்கை ஏதுமில்லை" என்று கூறப்பட்டுள்ளது.

English summary

The Chennai Meteorological Department has said that there is a possibility of rain with thundershowers at a few places in Tamil Nadu today, especially in the capital Chennai, there is a possibility of light to moderate rain with thundershowers today. Similarly, it has been said that there is little chance of change in the maximum temperature in Tamil Nadu today and tomorrow.