ரெட் அலர்ட்டை விட மோசம்.. சென்னை மீனம்பாக்கத்தில் “ரெக்கார்ட்” வைத்த அதிகனமழை! வெளுத்து வாங்கிருச்சே

சென்னை: சென்னை மீனம்பாக்கத்தில் ரெட் அலர்ட் எச்சரிக்கை அளவை விட அதிக கனமழை கடந்த 24 மணி நேரத்தில் கொட்டித்தீர்த்து இருப்பதாக வானிலை மையம் தெரிவித்து உள்ளது.

வடகிழக்கு பருவ மழையை ஒட்டி கடந்த சில வாரங்களாக சென்னை மற்றும் புறநகர் பகுதிகளில் கனமழை கொட்டித் தீர்த்து வருகிறது. குறிப்பாக நேற்று சென்னை, திருவள்ளூர், செங்கல்பட்டு, காஞ்சிபுரம் பகுதிகளில் மிக கனமழை பெய்ததால் சாலைகள், பாலங்கள், சுரங்க பாதைகளில் மழை நீர் தேங்கின. இந்த நிலையில் மழை மூலம் சென்னை மீனம்பாக்கம் புதிய ரெக்கார்ட் ஒன்றை படைத்து இருக்கிறது.

ஆம், சென்னை மீனம்பாக்கத்தில் கடந்த 24 மணி நேரத்தில் 26 சென்டி மீட்டர் அதி கனமழை கொட்டித்தீர்த்ததே இந்த ஆண்டில் அப்பகுதியில் பெய்த மழையின் அதிகபட்ச அளவாகும் என்று தெரிவிக்கப்பட்டு உள்ளது. பேரிடர் தடுப்பு அமைப்பு இந்த தகவலை வெளியிட்டு உள்ளது. வானிலை எச்சரிக்கையில் மழை பெய்யும் அளவை பொறுத்து மஞ்சள் அலர்ட், ஆரஞ்சு அலர்ட், ரெட் அலர்ட் விடுக்கப்படுவது வழக்கம்.

24 மணி நேரத்தில் 21 சென்டி மீட்டரோ அல்லது அதற்கு அதிகமாகவோ மழை பெய்யும் என்று கணிக்கப்பட்டால் ரெட் அலர்ட் எச்சரிக்கை விடுக்கப்படுவது வழக்கம். ஆனால், நேற்று ஆரஞ்சு அலர்ட் எச்சரிக்கை கூட விடுக்கப்படாத நிலையில், சென்னை மீனம்பாக்கத்தில் 26 சென்டி மீட்டர் மழை பெய்து இருப்பது ரெட் அலர்ட் எச்சரிக்கையை விட அதிகமாகும். இதேபோல் சென்னையின் பல்வேறு பகுதிகளில் 20 சென்டி மீட்டருக்கு நெருக்கமாக மழை கொட்டித்தீர்த்து இருக்கிறது.

இதுகுறித்து வானிலை மையம் வெளியிட்ட அறிவிப்பால், "நேற்று காலை 8.30 மணி முதல் இன்று காலை 6 மணி வரை சென்னையில் பெய்த மழை அளவு: அதிகபட்சமாக கொளத்தூர் - 156.0, திருவிக நகர் - 149.0, அம்பத்தூர் - 147.3, புழல் - 114.9. கோடம்பாக்கம் - 116.1, மலர் காலனி - 138.0, கத்திவாக்கம் - 107.4, அத்யா சுற்றுச்சூழல் பூங்கா - 113.9, ஆலந்தூர் ஜிசிசி - 120.9. மதுரவாயல் ஜிசிசி - 119.4. தேனாம்பேட்டை ஜிசிசி - 104.7

நுங்கம்பாக்கம் - 79.4, மீனம்பாக்கம் - 97, எண்ணூர் துறைமுகம் - 56, புழல் - 118.5, திரூர் (திருவள்ளூர்) - 70.0, YMCA நந்தனம் - 103.0, அண்ணா பல்கலைக்கழகம் - 106.5, செம்பரம்பாக்கம் - 47.5, தரமணி - 84.0, நியாட் பள்ளிக்கரணை - 61.2, கொளப்பாக்கம் (காஞ்சிபுரம்) - 95.5, சத்யபாமா பல்கலைக்கழகம் (காஞ்சிபுரம்) - 70.5, VIT சென்னை AWS (செங்கல்பட்டு) - 81.0 மிமீ அளவில் மழை கொட்டித் தீர்த்தது.

English summary

Meenambakkam, Chennai has received heavy rains exceeding the red alert level in the last 24 hours, according to the Meteorological Department.