தமிழகம், புதுவையில் இன்று வரை அதிக வெப்ப நிலை! எச்சரிக்கும் வானிலை மையம்
சென்னை: தமிழகத்தில் இன்று வரை அதிக வெயில் இருக்கும் என சென்னை வானிலை மையம் எச்சரிக்கை விடுத்துள்ளது.
சென்னை வானிலை ஆய்வு மையம் வெளியிட்ட செய்திக்குறிப்பில் கூறியிருப்பதாவது:
தமிழகம், புதுச்சேரி மற்றும் காரைக்கால் பகுதிகளில் மார்ச் 24 ஆம் தேதி முதல் 29-ம் தேதி வரை வறண்ட வானிலை நிலவக்கூடும். தமிழகத்தில் 24 ஆம் தேதி முதல் 27-ம் தேதி வரை ஓரிரு இடங்களில் அதிகபட்ச வெப்பநிலை 5 டிகிரி ஃபாரன்ஹீட் வரை அதிகரிக்கக்கூடும்.
சென்னை மற்றும் புறநகர் பகுதிகளில் வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 95 டிகிரி, குறைந்தபட்ச வெப்பநிலை 79 டிகிரி ஃபாரன்ஹீட் அளவை ஒட்டி இருக்கக்கூடும்.
23ஆம் தேதி காலை 8.30 மணியுடன் நிறைவடைந்த 24 மணி நேரத்தில் பதிவான மழை அளவுகளின்படி அதிகபட்சமாக கன்னியாகுமரி மாவட்டம் கோழிப்போர்விளை, கன்னியாகுமரி, தூத்துக்குடி மாவட்டம் காயல்பட்டினம் ஆகிய இடங்களில் தலா 5 செமீ, திருநெல்வேலி மாவட்டம் ஊத்து, கன்னியாகுமரி மாவட்டம் தக்கலை, இரணியல், திருநெல்வேலி மாவட்டம் மாஞ்சோலை ஆகிய இடங்களில் தலா 2 செமீ மழை பதிவாகியுள்ளது.
இவ்வாறு செய்திக்குறிப்பில் கூறப்பட்டுள்ளது.
முதியவர்கள், குழந்தைகளுடன் செல்லும் தாய்மார்கள் கையில் தண்ணீர் பாட்டிலும் குடையையும் மறக்காமல் எடுத்துச் செல்லுங்கள், முடிந்தவரை வெயில் அதிகரிக்கும் நேரமான பகல் 12 மணி முதல் 3 மணி வரை வெளியில் தலைக்காட்டாமல் இருப்பது நல்லது.
தண்ணீர், எலுமிச்சை சாறு, தேன், இஞ்சி போன்றவை சேர்த்து பானங்கள் தயாரிக்கவும். லேசான மற்றும் ஜீரணிக்க எளிதான உணவுகளை சாப்பிடவும். தர்பூசணி, வெள்ளரிக்காய், முலாம்பழம் உள்ளிட்ட நீர்ச்சத்து நிறைந்த பழங்கள், காய்கறிகள், சாலட் போன்றவை அதிகம் சாப்பிடவும்.
வறுத்த உணவுகள், அதிக எண்ணெய் மற்றும் கொழுப்பு உள்ள உணவுகளைத் தவிர்க்கவும். வெளிர் நிற இலகுவான பருத்தி ஆடைகளை அணியவும். தொப்பி, கண்ணாடி போன்றவை அணிந்து சூரிய ஒளியில் இருந்து தற்காத்துக் கொள்ளவும். சூரிய ஒளி அதிகம் இருக்கும் நேரத்தில் வெளியே செல்ல வேண்டியிருந்தால் நிழலில் செல்லவும்.
தினமும் இரண்டு வேளை குளிர்ந்த நீரில் குளிக்கவும். வயதானவர்கள், குழந்தைகளை சிறப்பு கவனத்தில் கொள்ளவும். நெல்லை மற்றும் திருப்பூர் மாவட்டங்களில் இயல்பை விட அதிக வெப்பநிலையும் ஈரோடு, கரூர், திண்டுக்கல், மதுரை மாவட்டங்களில் இயல்பை விட குறைந்த வெப்பநிலையும் பதிவாகியுள்ளது.
Click it and Unblock the Notifications
Sign in with Google