Chennai Rain: இன்னைக்கும் சென்னையில் மழை கொட்டும்.. வட + தென் தமிழகத்திற்கு வானிலை மையம் அலர்ட்

Updated: Wednesday, December 17, 2025, 9:31 [IST]

Subscribe to Oneindia Tamil

சென்னை: தமிழகத்தில் மீண்டும் மழை பெய்ய தொடங்கி இருக்கிறது. கடந்த சில நாட்களாக லேசான வெயில் அடித்து வந்த நிலையில் நேற்று கிளைமேட் அப்படியே மாறி மழை கொட்டியது. இந்த நிலையில் இன்றும் சென்னையில் லேசான மழைக்கு வாய்ப்பு உள்ளதாக வானிலை ஆய்வு மையம் கூறியுள்ளது. தென் தமிழகத்தில் ஓரிரு இடங்களில் மிதமான மழை பெய்யக்கூடும் எனவும் கூறப்பட்டுள்ளது.

அடுத்த 2 மணி நேரத்தில் அதாவது இன்று காலை 10 மணி வரை ராமநாதபுரம், தூத்துக்குடி, தேனி, திண்டுக்கல், தென்காசி, விருதுநகர், நெல்லை மாவட்டத்தின் மலைப்பகுதியை ஒட்டியுள்ள இடங்களில் லேசானது முதல் மிதமான மழை பெய்ய வாய்ப்பு உள்ளது என்றும் வானிலை மையம் கூறியுள்ளது.

வடகிழக்கு பருவமழை

தமிழகத்தில் வடகிழக்கு பருவமழை சீசன் நிலவி வருகிறது. பருவமழை தொடங்கிய நேரத்தில் கனமழை வெளுத்து வாங்கியது. அதன்பிறகு சற்று மழை குறைந்தது. மீண்டும் நவம்பர் மாத இறுதியில் கனமழை முதல் அதி கனமழை வரை கொட்டி தீர்த்தது. டிசம்பர் பிறந்ததும் மழை அப்படியே குறைந்துவிட்டது. கடந்த இரு வாரங்களாக மழை இன்றி பெரும்பாலும் வெயிலே அடித்தது.

இந்த நிலையில் தான் நேற்று திடீரென கிளைமேட் மாறி சென்னை உள்பட பல்வேறு பகுதிகளில் மழை பெய்தது. நாகை, விழுப்புரம், கடலூர் என பல்வேறு மாவட்டங்களில் நேற்று மழை கொட்டியது. இந்நிலையில் இன்றும் வட, தென் தமிழகத்தில் ஒரு சில இடங்களில் மழை பெய்ய வாய்ப்பு இருப்பதாக வானிலை மையம் கூறியுள்ளது. வானிலை அறிவிப்பில் கூறப்பட்டிருப்பதாவது;-

வட + தென் தமிழகம்

கிழக்கு திசை காற்றின் வேக மாறுபாடு காரணமாக, இன்று தென் தமிழகத்தில் ஒருசில இடங்களிலும், வட தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும். நாளை தென் தமிழகத்தில் ஓரிரு இடங்களில் லேசானது முதல் மிதமான மழை பெய்யக்கூடும். வட தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும்.

வெப்பநிலை குறையும்

19 ஆம் தேதி முதல் 21 ஆம் தேதி வரை தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும். 22 ஆம் தேதி தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும்.

இன்று தமிழகம், புதுவை மற்றும் காரைக்கால் பகுதிகளில் குறைந்தபட்ச வெப்பநிலையில் பொதுவாக பெரியமாற்றம் ஏதுமில்லை. நாளை முதல் 20 ஆம் தேதி வரை தமிழகத்தில் குறைந்தபட்ச வெப்பநிலை ஓரிரு இடங்களில் 2-3 டிகிரி செல்சியஸ் இயல்பை விட குறைவாக இருக்கக்கூடும்.

சென்னையில் இன்று மழைக்கு வாய்ப்பு

சென்னையில் இன்று (17-12-2025): வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்யக்கூடும். அதிகபட்ச வெப்பநிலை 28-29 டிகிரி செல்சியஸை ஒட்டியும், குறைந்தபட்ச வெப்பநிலை 23 டிகிரி செல்சியஸை ஒட்டியும் இருக்கக்கூடும்.

மீனவர்களுக்கான எச்சரிக்கை:

இன்று முதல் 19-12-2025 வரை: தென்தமிழக கடலோரப்பகுதிகள், மன்னார் வளைகுடா மற்றும் குமரிக்கடல் பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும். என்று கூறப்பட்டுள்ளது.