ஆளுநரின் 'பேரிடர்' ஆலோசனை: 'ஆர்வமா' கேள்வியை கேட்டு வாங்கி டெல்லியை தெறிக்கவிட்ட முதல்வர் ஸ்டாலின்!
டெல்லி: தமிழ்நாடு ஆளுநர் ஆர்.என்.ரவி பேரிடர் குறித்து ஆலோசனை நடத்துவதற்கு தமிழ்நாடு முதல்வர் மு.க.ஸ்டாலின் அதிரடியான பதிலடி கொடுத்துள்ளார்.
தமிழ்நாட்டில் மிக்ஜாம் புயலைத் தொடர்ந்து தென் மாவட்டங்கள் பெருமழை, வெள்ளத்தில் சிக்கி உள்ளன. தமிழ்நாடு அரசு முழு வீச்சில் மீட்பு, நிவாரணப் பணிகளை மேற்கொண்டு வருகிறது. இப்பணிகளை மேற்கொள்ள அமைச்சர்கள் குழு நியமிக்கப்பட்டுள்ளது. முப்படைகளும் களத்தில் தீவிரமாக மீட்பு பணிகளை மேற்கொண்டு வருகின்றன.
இந்த நிலையில் தமிழ்நாடு ஆளுநர் மாளிகை ஒரு அறிவிப்பை நேற்று வெளியிட்டிருந்தது. அதில், ஆளுநர் ரவி அவர்கள், தமிழ்நாட்டின் வெள்ளம் பாதித்த தென் மாவட்டங்களில் தற்போதைய நிலவரத்தை மறுஆய்வு செய்யவும், மீட்பு மற்றும் நிவாரணத்துக்கான அதிகபட்ச வளங்களைத் திரட்டும் சாத்தியம் குறித்தும் விவாதிக்க மத்திய அமைப்புகள் மற்றும் ஆயுதப் படைகளின் உயர் அதிகாரிகளுடனான கூட்டத்தை சென்னை ராஜ் பவனில் நாளை கூட்டியுள்ளார் என தெரிவிக்கப்பட்டிருந்தது.
தமிழ்நாடு அரசு மீட்பு பணிகளில் இறங்கியிருக்கும் நிலையில் ஆளுநர் ரவி தனியே ஆலோசனைக் கூட்டம் நடத்துவது பல கேள்விகளை எழுப்பியது. ஆனால் பாஜகவின் எச்.ராஜா உள்ளிட்டோர், "வெள்ளத்தால் பாதிக்கப் பட்ட தென்மாவட்ட மக்களை பார்பதை விட இந்து விரோத புள்ளி வைத்த கூட்டணி கூட்டம் தான் முதல்வருக்கு முக்கியமாகி விட்டதா? ஆனால் வெள்ள நிவாரணம் குறித்து அதிகாரிகளுடன் கூட்டம் நடத்தும் ஆளுநர். யார் தமிழக மக்களின் நலன் விரும்பி என்பது தெளிவு." என தெரிவித்திருந்தனர்.
இந்த நிலையில் டெல்லி சென்ற தமிழ்நாடு முதல்வர் மு.க.ஸ்டாலின் இன்று செய்தியாளர்களை சந்தித்தார். இந்த சந்திப்பின் போது, தமிழ்நாட்டில் மிக்ஜாம் புயல் பாதிப்பு, தென் மாவட்ட வெள்ள பாதிப்பு மற்றும் மீட்பு பணிகளை முதல்வர் ஸ்டாலின் விவரித்தார். இந்த சந்திப்பு முடிவடைந்த நிலையில் செய்தியாளர்கள், கவர்னர், ஆளுநர் என குரல் எழுப்பினர். இதனையடுத்து திரும்பி வந்த முதல்வர் ஸ்டாலின், 'ஆளுநர்' குறித்து என்ன கேள்வி என கேட்டார். இதற்கு, ஆளுநர் ஆலோசனை நடத்துகிறாரே அது பற்றிய உங்கள் ரியாக்ஷன் என்ன என செய்தியாளர்கள் கேட்டனர்.
இதற்கு முதல்வர் ஸ்டாலின், கொரோனா போன்ற பேரிடர் ஏற்பட்ட காலங்களில் பிரதமர் தான் ஆலோசனைக் கூட்டத்தை கூட்டினார். அப்ப குடியரசுத் தலைவர் ஏதாவது செஞ்சிருந்தா என்ன ரியாக்ஷன்? அதே ரியாக்ஷன்தான் இப்ப என சொல்லிவிட்டு நகர்ந்தார்.
Click it and Unblock the Notifications
Sign in with Google