சிவப்பு நிற ஜீப்பில்.. திடீரென நிலைத்தடுமாறி விழப்போன முதல்வர் ஸ்டாலின்! தாங்கி பிடித்த காவலர்கள்
சென்னை: மிக்ஜாம் புயலால் பாதிக்கப்பட்ட சென்னையை முதல்வர் ஸ்டாலின் சிவப்பு நிற ஜீப்பில் சென்று ஆய்வு செய்தார். இந்த வேளையில் அவர் சிவப்பு நிற ஜீப்பில் ஏற முயன்றபோது நிலைத்தடுமாறி கீழே விழப்போனது தொடர்பான வீடியோ இணையதளங்களில் வேகமாக பரவி வருகிறது.
வங்கக்கடலில் உருவான மிக்ஜாம் புயல் காரணமாக சென்னை, காஞ்சிபுரம், செங்கல்பட்டு, திருவள்ளுர் உள்ளிட்ட மாவட்டங்கள் பெரிய அளவில் பாதிப்பை சந்தித்தன. இந்த புயலால் தொடர்ந்து கனமழை பெய்தது.
இதனால் இந்த 4 மாவட்டங்கள் வெள்ளத்தால் பாதிக்கப்பட்டுள்ளது. சாலைகள், குடியிருப்பு பகுதிகளை வெள்ளம் சூழ்ந்தது. இதனால் பொதுமக்கள் வீடுகளிலேயே முடங்கினர்.
இந்த புயல் கடந்த 4ம் தேதி ஆந்திராவில் கரையை கடந்துள்ளது. இதனால் தற்போது சென்னையில் மழை என்பது பெரிய அளவில் இல்லை. இருப்பினும் மிக்ஜாம் புயல் காரணமாக வெளுத்து வாங்கிய கனமழையால் சென்னை தண்ணீரில் மூழ்கியது. தற்போது மழை இல்லாததால் வெள்ளம் என்பது பெரும்பாலான இடங்களில் வடிந்துள்ளது. இன்னும் சில இடங்களில் மட்டுமே தண்ணீர் உள்ளது.
அந்த தண்ணீரை வெளியேற்றும் பணியில் தமிழக அரசு, மாநகராட்சி அதிகாரிகள், பேரிடர் மீட்பு படையினர், தீயணைப்பு வீரர்கள் தீவிரமாக ஈடுபட்டு வருகின்றனர். அரசு, தன்னார்வலர்கள், தொண்டு நிறுவனங்கள், அரசியல் கட்சியினர் மூலம் அவர்களுக்கு உணவு பொட்டலங்கள், தண்ணீர் வழங்கப்பட்டு வருகிறது.
இதற்கிடையே தான் முதல்வர் ஸ்டாலின் சென்னையில் வெள்ள பாதிப்பு பகுதியில் ஆய்வு மேற்கொண்டார். சிவப்பு நி ஜீப்பில் தொடர்ந்து முதல்வர் ஸ்டாலின் பல இடங்களில் ஆய்வு செய்தார். அவருடன் இந்து அறநிலையத்துறை அமைச்சர் சேகர்பாபு, அதிகாரிகள் இருந்தனர். மீட்பு பணி மற்றும் நிவாரண பணிகளை விரைந்து முடிக்க வேண்டும் என முதல்வர் ஸ்டாலின் உத்தரவிட்டார். மேலும் நிவாரண முகாம்களில் உள்ள மக்களை சந்தித்து உணவு, பெட்ஷீட் உள்ளிட்ட நிவாரண உதவிகளை வழங்கினார்.
இந்த வேளையில் முதல்வர் ஸ்டாலின் சிவப்பு நிற ஜீப்பில் இருந்து நிலைத்தடுமாறி கீழே விழப்போன சம்பவம் குறித்த வீடியோ தற்போது வேகமாக பரவி வருகிறது. அதாவது சென்னையில் ஆய்வை முடித்த பிறகு முதல்வர் ஸ்டாலின் சிவப்பு நிற ஜீப்பில் முன்பகுதியில் டிரைவர் இருக்கை அருகே இருக்கும் இருக்கையில் ஏறி அமர சென்றார். அவரை தொடர்ந்து பாதுாவலர்கள் சென்றனர். ஜீப்பை பாதுகாவலர் ஒருவர் திறந்தார். இதையடுத்து முதல்வர் ஸ்டாலின் ஜீப்பில் ஏற முயன்றார். அப்போது திடீரென்று அவர் நிலைத்தடுமாறி கீழே விழ முயன்றார். ஆனால் சுதாரித்து கொண்ட பாதுகாவலர்கள் முதல்வர் ஸ்டாலினை தாங்கி பிடித்தனர். இந்த வீடியோ தற்போது இணையதளங்களில் பரவி வருகிறது.
Click it and Unblock the Notifications
Sign in with Google