Heavy Rain: கனமழை பிச்சு உதறும்.. கோவை, நீலகிரி, தேனியில் இடி, மின்னலுடன் வெளுத்து வாங்கும்.. வானிலை எச்சரிக்கை

சென்னை: காற்றழுத்த தாழ்வு பாதை (Trough) நிலவுவதன் காரணமாக இன்று முதல் அடுத்த ஒரு வாரத்திற்கு தமிழகத்தில் இடி, மின்னலுடன் கனமழை பெய்ய வாய்ப்பு உள்ளதாக வானிலை மையம் தெரிவித்துள்ளது. குறிப்பாக இன்று கோவை, நீலகிரி, தேனி மாவட்டங்களில் இடி, மின்னலுடன் கனமழை பெய்ய வாய்ப்பு உள்ளதாக வானிலை மையம் தெரிவித்துள்ளது.

தமிழகத்தில் கோடை வெயில் சுட்டெரிக்கிறது. வெளியில் சென்றாலே வியர்வையில் குளியல் போட்டுவிடும் நிலமை இருக்கிறது. ஆனால் நேற்று முதல் தென் மாவட்டங்களில் வானிலை மாறி வருகிறது. காலையில் வெயில் சுட்டெரித்தும், மாலையில் மேகமூட்டத்துடன் பலத்த காற்று வீசி வருகிறது. கோவை, ஈரோடு உள்ளிட்ட மேற்கு தொடர்ச்சி மாவட்டங்களில் ஒருசில இடங்களில் கனமழை கொட்டியது.

கோவையில் கனமழை கொளுத்தும்

இந்த நிலையில் இன்று முதல் அடுத்த ஒரு வாரத்திற்கு கனமழை கொட்டும் என வானிலை மையம் கூறியுள்ளது. இது தொடர்பாக வானிலை மையம் கூறியிருப்பதாவது:- சுமார் 0.9 கிமீ உயரத்தில் மரத்வாடா முதல் தென்தமிழகம் வரை உள் கர்நாடகா வழியாக ஒரு காற்றழுத்த தாழ்வு பாதை (Trough) நிலவுகிறது.

இதனால் இன்று 04-04-2026: தமிழகம், புதுவை மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். கோயம்புத்தூர் மாவட்டத்தின் மலைப்பகுதிகள், நீலகிரி மற்றும் தேனி மாவட்டங்களில் ஓரிரு இடங்களில் கனமழை பெய்ய வாய்ப்புள்ளது.

விருதுநகர், சிவகங்கையில் கனமழை

நாளை 05-04-2026: தமிழகம், புதுவை மற்றும் காரைக்கால் பகுதிகளில் ஒருசில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். கோயம்புத்தூர் மாவட்டத்தின் மலைப்பகுதிகள், நீலகிரி, ஈரோடு மற்றும் தேனி மாவட்டங்களில் ஓரிரு இடங்களில் கனமழை பெய்ய வாய்ப்புள்ளது.

நாளை மறுநாள் 06-04-2026: தென்தமிழகதில் ஒருசில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். வடதமிழகம், புதுவை மற்றும் காரைக்கால் பகுதிகளில் ஓரிரு இடங்களில் லேசான மழை பெய்யக்கூடும். விருதுநகர், மதுரை மற்றும் சிவகங்கை மாவட்டங்களில் ஓரிரு இடங்களில் கனமழை பெய்ய வாய்ப்புள்ளது.

10 ஆம் தேதி வரை மழை

07-04-2026: தமிழக கடலோர மாவட்டங்கள், மேற்கு தொடர்ச்சி மலை மாவட்டங்கள் மற்றும் புதுவை, காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.

08-04-2026 தமிழகம், புதுவை மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். 09-04-2026 மற்றும் 10-04-2026: தமிழகம், புதுவை மற்றும் காரைக்கால் பகுதிகளில் ஓரிரு இடங்களில் லேசான மழை பெய்யக்கூடும்.

அதிகபட்ச வெப்பநிலை பற்றிய முன்னறிவிப்பு:

இன்று முதல் 07-04-2026 வரை: வடதமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலை 2-3° செல்சியஸ் வரை படிப்படியாக உயரக்கூடும். தென்தமிழகத்தில் அதிகபட்ச வெப்பநிலையில் குறிப்பிடத்தக்க மாற்றதிற்கான வாய்ப்பு குறைவு.

சென்னையில் கிளைமேட் எப்படி?

சென்னையில் இன்று (04-04-2026) மற்றும் நாளை (05-04-2026) வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 36-37° செல்சியஸை ஒட்டியும், குறைந்தபட்ச வெப்பநிலை 26-27° செல்சியஸை ஒட்டியும் இருக்கக்கூடும்.

மழை அளவு:

* சின்னக்கல்லார் (கோயம்புத்தூர்) 7.
* சின்கோனா (கோயம்புத்தூர்) 5. வால்பாறை PAP (கோயம்புத்தூர்) 5, * வால்பாறை தாலுகா அலுவலகம் (கோயம்புத்தூர்) 5.
* உபாசி TRF AWS (கோயம்புத்தூர்) 3,
* வால்பாறை PTO (கோயம்புத்தூர்) 2,
* சோலையார் (கோயம்புத்தூர்) 1. தேக்கடி (தேனி) 1 செமீ மழை பெய்துள்ளது.

English summary

Heavy Rain: Due to a trough system, Tamil Nadu is expected to receive heavy rainfall with thunderstorms over the next week. Coimbatore, Nilgiris, and Theni may experience intense showers with lightning today, according to meteorological reports.