அடுத்த ரவுண்டு ரெடி! வங்க கடலில் 7ம் தேதி உருவாகுது குறைந்த காற்றழுத்த தாழ்வு பகுதி.. ஐஎம்டி கணிப்பு

டெல்லி: தெற்கு வங்கக் கடலின் மத்திய பகுதிகளில் வரும் 7 ஆம் தேதி குறைந்த காற்றழுத்த தாழ்வு பகுதி உருவாக வாய்ப்பு இருப்பதாக இந்திய வானிலை மையம் கூறியுள்ளது. மேலும் இந்த குறைந்த காற்றழுத்த தாழ்வு பகுதி மேற்கு வடமேற்கு திசையில் நகர கூடும் என்றும், 12 ஆம் தேதி வாக்கில், தென்மேற்கு வங்க கடலில் தமிழ்நாடு - இலங்கை கடலோர பகுதிகளை அடையும் என இந்திய வானிலை மையம் கணித்துள்ளது.

தமிழகத்தில் வடகிழக்கு பருவமழை தீவிரம் அடைந்துள்ளது. கடந்த அக்டோபர் மாதம் தொடங்கிய பருவழையால் தமிழகம் முழுக்க நல்ல மழை பெய்து வருகிறது. குறிப்பாக கடந்த 30 மற்றும் 1 ஆம் தேதிகளில் வங்க கடலில் உருவான ஃபெஞ்சல் புயல் காரணமாக சென்னை, விழுப்புரம், கடலூர் உள்ளிட்ட வடமாவட்டங்களிலும், புதுச்சேரியிலும் கனமழை கொட்டி தீர்த்தது.

குறிப்பாக தமிழ்நாட்டில் கடலூர், விழுப்புரம், கள்ளக்குறிச்சி ஆகிய மாவட்டங்களில் புயலின் கோரத்தாண்டவத்தால், அதிகனமழை கொட்டித்தீர்த்தது. இதனால் அந்த 3 மாவட்டங்களும் வெள்ளத்தில் மிதக்கின்றன. மேலும் இந்த புயல் காரணமாக திருவண்ணாமலை, கிருஷ்ணகிரி, சேலம் உள்ளிட்ட பல்வேறு மாவட்டங்களிலும் கனமழை கொட்டியதால், கடும் வெள்ளப்பெருக்கு ஏற்பட்டது.

கனமழை பெய்த நிலையில், தற்போது தமிழகம் முழுக்க மழை அவ்வளவாக இல்லை. சென்னையிலும் இன்று பகல் முழுக்க சுள்ளென்று வெயில் தான் அடித்தது. நேற்று இரவு திடீர் மழை பெய்து சர்பிரைஸ் கொடுத்தது. இன்று அதிகாலையும் லேசான மழை பெய்தது. தமிழகத்தில் அடுத்த ஒருவாரத்திற்கு அதாவது வரும் 11 ஆம் தேதி வரை லேசானது முதல் மிதமான மழை பெய்யும் என்று வானிலை ஆய்வு மையம் தெரிவித்துள்ளது.

சென்னையை பொறுத்தவரை அடுத்த 24 மணி நேரத்திற்கு வானம் ஓரளவு மேக மூட்டத்துடன் காணப்படும் எனவும் நகரின் ஒரு சில பகுதிகளில் இடி மின்னலுடன் கூடிய லேசானது முதல் மிதமான மழை பெய்யக்கூடும். அதிபட்ச வெப்ப நிலை 32-33 டிகிரி செல்சியஸ்சை ஒட்டியும் குறைந்தபட்ச வெப்ப நிலை 25-26 டிகிரி செல்சியை ஒட்டியும் இருக்க கூடும் என்று தெரிவித்துள்ளது.

மழை சற்று லீவு விட்டது போல தெரிந்துள்ள நிலையில், அடுத்த ரவுண்டுக்கு ரெடியானது என்பது போல வங்க கடலில் குறைந்த காற்றழுத்த தாழ்வு பகுதி உருவாக வாய்ப்பு உள்ளதாக இந்திய வானிலை ஆய்வு மையம் தெரிவித்துள்ளது. தெற்கு வங்கக் கடலின் மத்தியப் பகுதிகளில் வரும் 7 ஆம் தேதி குறைந்த காற்றழுத்த தாழ்வு பகுதி உருவாக வாய்ப்பு உள்ளதாக தெரிவிக்கப்பட்டுள்ளது.

குறைந்த காற்றழுத்த தாழ்வு பகுதி உருவாகி, மேற்கு - வடமேற்கு திசையில் நகரக் கூடும் என்றும், வரும் 12ம் தேதி வாக்கில் தென்மேற்கு வங்கக் கடலில் தமிழ்நாடு - இலங்கை கடலோர பகுதிகளை அடையக் கூடும் எனவும் கணிக்கபட்டுள்ளது.

English summary

The India Meteorological Department has said that a low-pressure area is likely to form over the central parts of the south Bay of Bengal on the 7th. The low-pressure area is also likely to move in a west-northwesterly direction and by the 12th, it will reach the Tamil Nadu-Sri Lanka coast in the southwest Bay of Bengal, the Meteorological Department has predicted.