நவ. 26ல் அந்தமானில் உருவாகும் புதிய காற்றழுத்தம்.. அப்படியே நகர்ந்து வந்தால் என்னவாகும்? ஆஹா சூப்பர்!
சென்னை: அந்தமான் கடல் பகுதியில் வரும் 26ஆம் தேதி குறைந்த காற்றழுத்த தாழ்வு பகுதி உருவாகக் கூடும் என வானிலை மையம் தெரிவித்துள்ளது.
தமிழகத்தில் கடந்த அக்டோபர் மாதம் வடகிழக்கு பருவமழை தொடங்கினாலும் அந்த மாதத்தில் மழையின் அளவு இயல்பை காட்டிலும் குறைவாக இருந்தது. இதைத் தொடர்ந்து தமிழகத்தில் தற்போது வடகிழக்கு பருவமழை தீவிரமடைந்துள்ளது.
தமிழகத்தில் நேற்று முன் தினம் பரவலாக மழை பதிவாகியுள்ளது. சென்னையில் கடந்த இரு தினங்களாக மழை தொடர்ந்து பெய்தது. நேற்று மாலைக்கு மேல் சென்னையின் ஒரு சில இடங்களில் மழை நின்றது. பிற்பகலில் சற்று வெயிலும் வந்தது.
இந்த நிலையில் தமிழகத்தில் 5 இடங்களில் மிக கனமழையும் 15 இடங்களில் கனமழையும் பதிவாகியுள்ளது. அதிகபட்சமாக திருப்பூரில் 17 செ.மீ. மழை பதிவாகியிருந்தது. இதையடுத்து தமிழகம் மற்றும் அதனையொட்டியுள்ள கேரள பகுதிகளின் மேல் நிலவும் வளிமண்டல கீழடுக்கு சுழற்சியால் தமிழகம், புதுவையில் இன்று முதல் 3 நாட்களுக்கு பரவலாக மிதமான மழை பெய்ய வாய்ப்புள்ளது.
அது போல் நீலகிரி, கோவை, திருப்பூர், தேனி, திண்டுக்கல், மதுரை, சிவகங்கை, விருதுநகர், ராமநாதபுரம், தென்காசி, தூத்துக்குடி, நெல்லை, கன்னியாகுமரி, ஆகிய மாவட்டங்களில் ஓரிரு இடங்களில் கனமழையும் நாளை 24 ஆம் தேதி நீலகிரி, கோவை, திருப்பூர், தேனி, திண்டுக்கல், மதுரை, சிவகங்கை, விருதுநகர், ராமநாதபுரம், தென்காசி, தூத்துக்குடி, நெல்லை, கன்னியாகுமரி, ஆகிய மாவட்டங்களில் ஓரிரு இடங்களில் கனமழையும் நாளை நீலகிரி, கோவை, தேனி, தென்காசி, திருவள்ளூர் ஆகிய மாவட்டங்களில் ஓரிரு இடங்களில் கனமழையும் பெய்யக் கூடும்.
இதை அடுத்து வரும் 26 ஆம் தேதி அந்தமான் கடல் பகுதியில் குறைந்த காற்றழுத்தத் தாழ்வு பகுதி உருவாகக் கூடும் என்றும் இது மேற்கு வடமேற்கு திசையில் நகர்ந்து தென்கிழக்கு வங்கக் கடல் மற்றும் அதை ஒட்டியுள்ள அந்தமான் கடல் பகுதியில் காற்றழுத்த தாழ்வு மண்டலமாக வலுப்பெறக் கூடும் என்றும் வரும் 26ஆம் தேதிக்குள் மீனவர்கள் கரைக்கு திரும்ப வேண்டும் என வானிலை மையம் தெரிவித்துள்ளது.
அந்தமான் கடல் பகுதியில் உருவாகும் இந்த காற்றழுத்தம் வலுவிழந்த நிலையில் நகர்ந்து வந்தால் தமிழகத்திற்கு நல்ல மழை இருக்கும். அதிலும் சென்னையில் அதிக மழை பொழிவை பார்க்கலாம் என வானிலை ஆய்வாளர்கள் தெரிவித்துள்ளனர்.
Click it and Unblock the Notifications
Sign in with Google