ஷாக் நியூஸ்.. மழையை கடத்திட்டு போச்சே புயல்! அடுத்த சில நாட்கள் டல்லுதான் - அப்போ சென்னை நிலவரம்?

சென்னை: வங்கக்கடலில் நிலைகொண்டு இருந்த புயல் வங்கதேசத்தில் கரையை கடந்த நிலையில், தமிழ்நாட்டில் அடுத்த சில நாட்களுக்கு மிதமான மழைக்கே வாய்ப்பு உள்ளதாக சென்னை வானிலை ஆய்வு மையம் தெரிவித்து உள்ளது.

அதில், "நேற்று (24-10-2023) காலை வடமேற்கு மற்றும் அதனை ஒட்டிய வடகிழக்கு வங்கக்கடல் பகுதிகளில் நிலவிய மிக தீவிர புயல் ஹாமூன் நேற்று மாலை 5.30 மணி அளவில் தீவிர புயலாக வலுவிழந்தது. இன்று (25-10-2023) காலை 01.30-02.30 மணி அளவில் புயலாக வலுவிழந்து வங்கதேச கரையை தெற்கு சிட்டகாங் (Chittagong) க்கு அருகில் கரையை கடந்தது.

வடக்கு கேரளா மற்றும் அதனை ஒட்டிய பகுதிகளில் ஒரு வளிமண்டல கீழடுக்கு சுழற்சி நிலவுகிறது. தென்மேற்கு வங்கக்கடலை ஒட்டிய தெற்கு ஆந்திர கடலோர பகுதிகளில் ஒரு வளிமண்டல கீழடுக்கு சுழற்சி நிலவுகிறது. இன்று தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.

26.10.2023 முதல் 28.10.2023 வரை: தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் லேசானது முதல் மிதமான மழை பெய்யக்கூடும். 29.10.2023: தமிழ்நாடு, புதுச்சேரி மற்றும் காரைக்கால் பகுதிகளில் ஒரு சில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். 30.10.2023 மற்றும் 31.10.2023: தமிழ்நாடு, புதுச்சேரி மற்றும் காரைக்கால் பகுதிகளில் ஒரு சில இடங்களில் லேசானது முதல் மிதமான மழை பெய்யக்கூடும்.

சென்னை மற்றும் புறநகர் பகுதிகளுக்கான வானிலை முன்னறிவிப்பு: அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 34-35 டிகிரி செல்சியஸ் மற்றும் குறைந்தபட்ச வெப்பநிலை 25 டிகிரி செல்சியஸை ஒட்டியும் இருக்கக்கூடும்.

கடந்த 24 மணி நேரத்தில் பதிவான மழை அளவு (சென்டிமீட்டரில்): போடிநாயக்கனூர் (தேனி) 5, பட்டுக்கோட்டை (தஞ்சாவூர்), சோத்துப்பாறை (தேனி), வால்பாறை PTO (கோயம்புத்தூர்) தலா 3, வேதாரண்யம் (நாகப்பட்டினம்), மானாமதுரை (சிவகங்கை), ராமநாதபுரம் (ராமநாதபுரம்), தொண்டி (ராமநாதபுரம்), ஸ்ரீவில்லிபுத்தூர் (விருதுநகர்), கூடலூர் (தேனி), தேக்கடி (தேனி), பெரியாறு (தேனி), சிவகிரி (தென்காசி), பயணியர் விடுதி சிவகங்கை (சிவகங்கை), வீரபாண்டி (தேனி), பெலாந்துறை (கடலூர்), அரண்மனைப்புதூர் (தேனி), கருப்பாநதி அணை (தென்காசி), மணியாச்சி (தூத்துக்குடி) தலா 2, திருவாடானை (ராமநாதபுரம்), உத்தமபாளையம் (தேனி), குப்பணம்பட்டி (மதுரை), ஆர்.எஸ்.மங்கலம் (ராமநாதபுரம்), ஆயின்குடி (புதுக்கோட்டை), கடல்குடி (தூத்துக்குடி), சோலையார் (கோயம்புத்தூர்) தலா 1.

மீனவர்களுக்கான எச்சரிக்கை: ஏதுமில்லை. " என்று குறிப்பிடப்பட்டு உள்ளது.

English summary

Chennai Meteorological Department has informed that Tamil Nadu is likely to receive moderate rain for the next few days as the storm that was in the Bay of Bengal has crossed the shores of Bangladesh.