அலெர்ட்! இன்றும் மழை வெளுக்கும்.. நேற்று மழை கொட்டியது எங்கு தெரியுமா? வானிலை மையம் தகவல்!

சென்னை: சென்னை உட்பட தமிழ்நாட்டின் பல்வேறு மாவட்டங்களில் இடி மின்னலுடன் மழை பெய்யக்கூடும் என வானிலை மையம் தகவல் தெரிவித்துள்ளது.

தமிழ்நாட்டில் இந்த ஆண்டு கோடை வெப்பம் முந்தைய ஆண்டுகளைக் காட்டிலும் அதிக அளவில் இருந்தது. பல நாட்கள் தொடர்ச்சியாக 100 டிகிரி ஃபாரன்ஹீட்க்கும் அதிகமாக வெப்பநிலை பதிவானது. இதற்கிடையே சில நாட்களாக வெப்பம் குறைந்து வந்த சூழலில் கடந்த சில நாட்களாக பல இடங்களில் மழை வெளுத்து வாங்கி வருகிறது.

இந்நிலையில், நேற்று சென்னையின் பல இடங்களில் 8 செ.மீ மழை பதிவாகியுள்ளது. இன்றும் சென்னை உட்பட தமிழ்நாட்டின் பல்வேறு மாவட்டங்களில் இடி மின்னலுடன் லேசானது முதல் மிதமான மழை பெய்யக்கூடும் எனத் தெரிவித்துள்ளது.

தென்மேற்கு வங்கக்கடல், அதை ஒட்டிய மத்திய மேற்கு வங்கக்கடல் பகுதிகளில் மேலடுக்கு சுழற்சி நிலவுகிறது. இதன் காரணமாக, வட தமிழ்நாட்டில் ஒருசில இடங்களிலும், புதுச்சேரி, காரைக்கால் பகுதிகளிலும், தென் தமிழ்நாட்டில் ஓரிரு இடங்களிலும் இன்று (ஜூன் 21) இடி, மின்னலுடன் லேசானது முதல் மிதமான மழை பெய்யக்கூடும்.

தமிழ்நாடு, புதுச்சேரி, காரைக்காலில் ஓரிரு இடங்களில் நாளை முதல் 3 நாட்களுக்கு (ஜூன் 22, 23, 24) இடி, மின்னலுடன் லேசானது முதல் மிதமான மழை பெய்யக்கூடும். சென்னை, புறநகர் பகுதிகளில் வானம் இன்று ஓரளவு மேக மூட்டத்துடன் காணப்படும். சில இடங்களில் இடி, மின்னலுடன் மிதமான மழை பெய்யக்கூடும்.

தமிழகத்தில் நேற்று (ஜூன் 20) காலை 8.30 மணியுடன் நிறைவடைந்த 24 மணி நேரத்தில் அதிகபட்சமாக சென்னை தரமணி, காஞ்சிபுரம் மாவட்டம் குன்றத்தூர், செங்கல்பட்டு மாவட்டம் மதுராந்தகத்தில் 8 செ.மீ மழை பதிவாகியுள்ளது.

சென்னை அயனாவரம், டிஜிபி அலுவலகம், காஞ்சிபுரம் மாவட்டம் ஸ்ரீபெரும்புதூர், ராணிப்பேட்டை மாவட்டம் மின்னல், கடலூர் மாவட்டம் சிதம்பரம், அண்ணாமலை நகரில் 7 செ.மீ மழை பதிவாகியுள்ளது என்று சென்னை வானிலை ஆய்வு மைய இயக்குநர் செந்தாமரை கண்ணன் தெரிவித்துள்ளார்.

English summary

As per CMD, Light to moderate rain with thunder and lightning may occur at a few places in North Tamil Nadu, Puducherry, Karaikal and a couple of places in South Tamil Nadu today (June 21).