இது வெறும் டிரைலர்தான்.. இனிதான் மெயினே வருதாம்.. டிசம்பரில் அதிக மழைக்கு சான்ஸ்! ஐஎம்டி கணிப்பு

டெல்லி: தமிழ்நாடு, கேரளா, ஆந்திரா உள்ளிட்ட தென் மாநிலங்களில் நடப்பு டிசம்பர் மாதத்தில் இயல்பை விட கூடுதலாக 31 சதவீதம் மழைக்கு வாய்ப்பு இருப்பதாக இந்திய வானிலை ஆய்வு மையம் தெரிவித்துள்ளது. இந்த டிசம்பர் மாதத்தில் இயல்பாக 100 சதவீதம் என்றால், 131 சதவீதம் மழை பெய்யும் என்று நீண்ட நாட்கள் அறிக்கையாக இந்திய வானிலை ஆய்வு மையம் வெளியிட்டுள்ளது.

தமிழகத்தில் வடகிழக்கு பருவமழை தற்போது தீவிரமடைந்துள்ளது. ஃபெஞ்சல் புயல் காரணமாக தமிழகத்தில் கனமழை கொட்டியது. தென் மாவட்டங்களில் பெரிய அளவில் மழை இல்லை என்றாலும், தமிழகத்தின் வட மாவட்டங்களில் கனமழை கொட்டி தீர்த்தது.

கடந்த 28 ஆம் தேதி வங்கக் கடலில் உருவான ஃபெஞ்சல் புயலால் அன்றைய தினமே தமிழகத்தின் வட மாவட்டங்கள், கடலோர மாவட்டங்களில் காற்றுடன் மழை கொட்ட ஆரம்பித்தது. இந்த மழை நேற்று வரை தொடர்ந்தது. குறிப்பாக புதுச்சேரி, விழுப்புரம், திண்டிவனம், கடலூர், கிருஷ்ணகிரி, சேலம், திருவண்ணாமலை உள்ளிட்ட மாவட்டங்களில் கனமழை கொட்டி தீர்த்தது.

குறிப்பாக திண்டிவனம் மாவட்டம் மயிலத்தில் ஒரே நாளில் 51 செமீ மழை பதிவானது. இதேபோல் விழுப்புரத்தில் ஒரே நாளில் 50 செமீட்டரும், கடலூரில் 40 செமீட்டரும், புதுவையில் 48 செமீ மழையும் பதிவானது. இதனால் கடலூர், விழுப்புரம், திருவண்ணாமலை, கிருஷ்ணகிரி, திண்டிவனம் ஆகிய மாவட்டங்கள் வெள்ளத்தில் தத்தளித்தன. சாலைகள், தெருக்கள், வீடுகளுக்குள்ளும் மழைநீர் புகுந்தது.

இதனால் மக்களின் இயல்பு வாழ்க்கை அடியோடு முடங்கியது. தற்போது டிசம்பர் மாதம் பிறந்துள்ளது. இந்த நிலையில் இந்த டிசம்பர் மாதத்தில் வழக்கத்தை விட தென் மாநிலங்களில் 31 சதவீதம் கூடுதல் மழைப்பொழிவு இருக்கும் என்று இந்திய வானிலை மையம் தெரிவித்துள்ளது. இது தொடர்பான வானிலை அறிவிப்பில் கூறப்பட்டிருப்பதாவது:-

ஒட்டு மொத்தமாக தென் இந்திய மாநிலங்களில் இந்த டிசம்பர் மாதத்தில் இயல்பை விட கூதலாக மழை பெய்யும். தமிழ்நாடு, புதுவை, ஆந்திர பிரதேசம், கேரளா, தெற்கு கர்நாடகா ஆகிய தென் மாநிலங்களில் இயல்பை விட 31 சதவீதம் அதிகமாக மழை பெய்ய வாய்ப்பு உள்ளது என்று இந்திய வானிலை ஆய்வு மையம் தெரிவித்துள்ளது.

இயல்பாக டிசம்பர் மாதத்தில் 100 சதவீதம் மழை பெய்யும் போது, நடப்பு டிசம்பர் மாதத்தில் கூடுதலாக 31 சதவீதம் என மொத்தம் 131 சதவீதம் மழை பெய்யும். நீண்ட கால வானிலை அறிக்கையாக டிசம்பர் மாதத்தில் எவ்வளவு மழை பெய்யும் என்ற தகவல் இருக்கும். ஒட்டுமொத்தமாக 1971 ஆம் ஆண்டில் இருந்து 2020 ஆண்டு வரை எடுக்கப்பட்ட கணெக்கெடுப்பில் இருந்து இந்த சராசரி மழை அளவு கணக்கிடப்படும். இவ்வாறு அதில் கூறப்பட்டுள்ளது.

English summary

The India Meteorological Department has said that there is a possibility of 31 percent more rainfall than normal in the southern states including Tamil Nadu, Kerala, and Andhra Pradesh in the current month of December. The India Meteorological Department has issued a long-awaited report that if the normal rainfall is 100 percent, then there will be 131 percent rainfall this month.