தமிழகத்தில் இன்று டமால், டுமீல் சம்பவம்.. வேலையை காட்டும் வடகிழக்கு பருவமழை! வானிலை மையம் வார்னிங்

சென்னை: தமிழ்நாட்டில் வடகிழக்கு பருவமழை தீவிரமடைந்திருக்கிறது. இன்று சென்னை உட்பட பல்வேறு பகுதிகளில் இடி, மின்னலுடன் மழை பெய்யும் என வானிலை மையம் எச்சரித்துள்ளது.

இந்தியாவை பொறுத்த வரை தென்மேற்கு மற்றும் வடகிழக்கு என இரண்டு பருவமழைகள், மழைப்பொழிவை கொடுக்கும். இரண்டுமே தமிழ்நாட்டிற்கும் போதுமான மழையை கொடுக்கும். அந்த வகையில் கடந்த செப்.30ம் தேதியுடன் தென்மேற்கு பருவமழை முடிவடைந்தது. அக்.1 முதல் வடகிழக்கு பருவமழை தொடங்கியுள்ளது. இந்த 19 நாட்களில் இயல்பை விட 73% அதிக மழை பெய்திருக்கிறது. சென்னையிலும், திருவள்ளூர் மாவட்டத்திலும் இயல்பை விட கூடுதலாக மழை பெய்திருக்கிறது.

இந்நிலையில் இன்று மழை குறித்து வெளியாகியுள்ள அறிவிப்பில், "தென்னிந்திய பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. மத்தியகிழக்கு மற்றும் அதனை ஒட்டிய லட்சத்தீவு பகுதிகளின் மேல் ஒரு வளிமண்டல மேலடுக்கு சுழற்சி நிலவுகிறது. எனவே இன்று தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும்.

நாளை, தமிழகத்தில் அநேக இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். திருப்பத்தூர், வேலூர், ராணிப்பேட்டை, திருவண்ணாமலை, கிருஷ்ணகிரி, தருமபுரி, சேலம், ஈரோடு, கள்ளக்குறிச்சி, திருச்சிராப்பள்ளி, புதுக்கோட்டை, சிவகங்கை, திண்டுக்கல் மற்றும் மதுரை மாவட்டங்களில் ஓரிரு இடங்களில் கனமழை பெய்யவாய்ப்புள்ளது.

21ம் தேதி தமிழகத்தில் அநேக இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். வேலூர், ராணிப்பேட்டை, திருவண்ணாமலை, கள்ளக்குறிச்சி, பெரம்பலூர், அரியலூர், கடலூர், விழுப்புரம், திருச்சிராப்பள்ளி, தஞ்சாவூர் மற்றும் புதுக்கோட்டை மாவட்டங்கள் மற்றும் புதுச்சேரியில் ஓரிரு இடங்களில் கனமழை பெய்யவாய்ப்புள்ளது.

22ம் தேதி தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். 23ம் தேதி தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், லேசானது முதல் மிதமான மழை பெய்யக்கூடும்" என தெரிவிக்கப்பட்டிருக்கிறது.

English summary

Northeast Monsoon has intensified in Tamil Nadu. The Meteorological Department has warned that there will be rain with thunder and lightning in various parts including Chennai today.