நவ.27ஆம் தேதி வரை வட தமிழகத்தில் பனிப்பொழிவு! சென்னையில் மார்கழி போல் குளிர் நடுங்கும்! வெதர்மேன்

சென்னை: வடதமிழகத்தில் வரும் 27ஆம் தேதி வரை காலை வேளைகளில் பனிப்பொழிவு இருக்கும் என தமிழ்நாடு வெதர்மேன் பிரதீப் ஜான் தெரிவித்துள்ளார். சென்னை, காஞ்சிபுரம், திருவள்ளூர், செங்கல்பட்டு ஆகிய மாவட்டங்களுக்கும் இது இருக்கும் என்றும் அவர் தெரிவித்துள்ளார்.

இதுகுறித்து அவர் தனது ட்விட்டர் பக்கத்தில் கூறியிருப்பதாவது: வரும் 27ஆம் தேதி வரை காலை வேளைகளில் பனித்துளிகளை காணலாம். இது மார்கழி மாதம் போல் வறண்டு போவதும் குளிர்வதுமாக இருக்கும். குறிப்பாக வடதமிழகத்தில் இந்த பனிப்பொழிவு இருக்கும். இவ்வாறு பிரதீப் ஜான் தெரிவித்துள்ளார்.

அடுத்த சில நாட்களுக்கு தென் தமிழகத்தில் ஈரப்பதம் கொண்ட காற்று வீசுவது தொடரும் என்றும் அவர் தெரிவித்துள்ளார். ஆனால் தற்போதே பல்வேறு இடங்களில் காலையும் இரவு நேரங்களிலும் பனித்துளிகள் இருக்கின்றன. அது போல் குளிர்ச்சியான சூழலும் நிலவுகிறது. மாலை 5 மணியானாலே குளிரத் தொடங்குகிறது.

சென்னை வானிலை மையம் வெளியிட்டுள்ள அறிக்கையில் மாலத்தீவு மற்றும் பூமத்திய ரேகையை ஒட்டிய இந்திய பெருங்கடல் பகுதிகள் முதல் தென்கிழக்கு அரபிக்கடல் பகுதிகள் வரை ஒரு வளிமண்டல கீழடுக்கு சுழற்சி நிலவுகிறது. இதன் காரணமாக தமிழகத்தில் இன்று அநேக இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். கடலூர், அரியலூர், தஞ்சாவூர், திருவாரூர், நாகப்பட்டினம், மயிலாடுதுறை, புதுக்கோட்டை, சிவகங்கை, இராமநாதபுரம், தூத்துக்குடி, திருநெல்வேலி, கன்னியாகுமரி மாவட்டங்களிலும், காரைக்கால் பகுதிகளிலும் ஓரிரு இடங்களில் கனமழை பெய்ய வாய்ப்புள்ளது.

நாளை தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும், இடி, மின்னலுடன் கூடிய லேசானது முதல் மிதமான மழை பெய்யக்கூடும். 19-11-2024 முதல் 23-11-2024 வரை தமிழகத்தில் ஒரிரு இடங்களிலும், புதுவை மற்றும் காரைக்கால் பகுதிகளிலும், லேசானது முதல் மிதமான மழை பெய்யக்கூடும்.

சென்னை மற்றும் புறநகர் பகுதிகளில், அடுத்த 24 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி, மின்னலுடன் கூடிய லேசானது முதல் மிதமான மழை பெய்ய வாய்ப்புள்ளது. அதிகபட்ச வெப்பநிலை 32-33° செல்சியஸை ஒட்டியும், குறைந்தபட்ச வெப்பநிலை 25-26° செல்சியஸை ஒட்டியும் இருக்கக்கூடும்.

அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி, மின்னலுடன் கூடிய லேசான/மிதமான மழை பெய்ய வாய்ப்புள்ளது. அதிகபட்ச வெப்பநிலை 33° செல்சியஸை ஒட்டியும், குறைந்தபட்ச வெப்பநிலை 25-26° செல்சியஸை ஒட்டியும் இருக்கக்கூடும். இவ்வாறு சென்னை வானிலை மையம் தெரிவித்துள்ளது.

English summary

Tamil nadu weatherman Pradeep John says that Till 27th we can see even dew (pani) in the mornings due to high pressure, it will very dry and cold as if winter is on, in KTCC and north Tamil Nadu belts.