மதுரை டூ சென்னை வரை.. 13 இடங்களில் சதமடித்த வெயில்.. அதிகபட்சமாக 106 டிகிரி.. எங்கேன்னு பாருங்க

சென்னை: தமிழகத்தில் கடந்த ஒரு வாரமாக வெயில் கடுமையாக சுட்டெரித்து வருகிறது. நாளுக்கு நாள் அதிகரித்து வரும் வெப்பத்தால் மக்கள் பரிதவித்து வருகிறார்கள். நேற்றும் தமிழகத்தில் 13 இடங்களில் வெயில் சதமடித்துள்ளது. மதுரை விமான நிலையத்தில் மட்டும் 106.16 டிகிரி செல்சியஸ் வெப்பநிலை பதிவானது. எனினும் நேற்று மாலை நேரத்துக்கு பிறகு சென்னை, காஞ்சிபுரம் உள்ளிட்ட பகுதிகளில் ஒருசில இடங்களில் லேசான மழை பெய்தது.

தமிழகத்தில் மேற்கு திசை காற்று மாறுபாடு காரணமாக ஒருசில இடங்களில் லேசானது முதல் மிதமான மழை பெய்து வருகிறது. எனினும் கடந்த ஒரு வாரமாக அளவுக்கு அதிகமாக வெயிலின் அளவு இருந்து வருகிறது. ஏப்ரல் மே மாத கிளைமேட் தான் நிலவுகிறதோ என்று நினைக்கும் அளவுக்கு வெயில் அனலாக தகித்து வருகிறது.

சுட்டெரித்த வெயில்

குறிப்பாக மதியம் நேரங்களில் வெயில் கடுமையாக சுட்டெரிக்கிறது. வெளியில் சென்றவர்கள் வியர்வையிலேயே குளிக்கும் அளவுக்கு வெப்பம் அனலாக தகித்து வருகிறது. வரும் நாட்களிலும் வெயிலின் அளவு 2 முதல் 3 டிகிரி செல்சியஸ் வரை அதிகரிக்க வாய்ப்பு உள்ளது என்றும், ஒரு சில இடங்களில் வெயிலால் அசவுகரியம் ஏற்படலாம் எனவும் சென்னை வானிலை ஆய்வு மையம் கூறியிருந்தது.

இதற்கிடையே நேற்று மட்டும் தமிழகத்தில் 13 இடங்களில் வெயில் சதமடித்துள்ளது. இதில் அதிகபட்சமாக மதுரை விமான நிலையத்தில் 106 டிகிரி செல்சியஸ் வெப்பநிலை பதிவானது. சென்னையில் மீனம்பாக்கம், நுங்கம்பாகத்தில் அதிகபட்சமாக 102 டிகிரி செல்சியஸ் வெப்பநிலை பதிவானது.

வெயில் அளவு:

* மதுரை விமான நிலையம் - 106.16 டிகிரி செல்சியஸ் - (41.2 பாரன்ஹீட்)
* மதுரை நகரம் - 104.36 - (40.2)
* சென்னை மீனம்பாக்கம் - 102.74 - (39.3)
* சென்னை நுங்கம்பாக்கம் - 102.56 - (39.2)
* தூத்துக்குடி - 102.56 - (39.2)

* நாகப்பட்டினம் - 101.84 (38.8)
* வேலூர் - 101.66 - (38.7)
* ஈரோடு - 101.48 - (38.6)
* திருத்தணி - 101.3 - (38.5)

* கடலூர் - 100.58 - (38.4)
* திருச்சி - 100.58 - (38.4)
* கரூர் - 100.4 - (38)
* தஞ்சாவூர் - 100.4 - (38)

வானிலை மையம் எச்சரிக்கை:

09-07-2025 முதல் 10-07-2025 வரை: தமிழகத்தில் அதிகபட்ச வெப்பநிலையில் பொதுவாக மாற்றத்திற்கான வாய்ப்பு குறைவு. 09-07-2025 முதல் 10-07-2025 வரை: தமிழகம், புதுவை மற்றும் காரைக்கால் பகுதிகளில் ஒருசில இடங்களில் அதிகபட்ச வெப்பநிலை 2-3° செல்சியஸ் இயல்பை விட அதிகமாக இருக்கக்கூடும்.

09-07-2025 முதல் 10-07-2025 வரை: அதிக வெப்பநிலையும், அதிக ஈரப்பதமும், குறைந்தபட்ச வெப்பநிலை ஓரிரு இடங்களில் இயல்பை விட 2-3" செல்சியஸ் அதிகமாகவும் இருக்கும் நிலையில், தமிழகத்தில் ஓரிரு பகுதிகளில் அசெளகரியம் ஏற்படலாம் என்று வானிலை மையம் கூறியுள்ளது.

மழையும் பெய்ய வாய்ப்பு

வெயில் ஒருபுறம் சுட்டெரித்து வந்தாலும், மறுபுறம் அவ்வப்போது ஒருசில இடங்களில் மழை பெய்து வருகிறது. நேற்று மாலை கூட காஞ்சிபுரம், சென்னை புறநகர் பகுதிகளில் லேசானது முதல் மிதமான மழை பெய்தது. வரும் நாட்களிலும் தமிழகத்தில் இடி மின்னலுடன் மழை பெய்ய வாய்ப்பு இருப்பதாக சென்னை வானிலை ஆய்வு மையம் கூறியுள்ளது. வரும் 14 ஆம் தேதி வரை தமிழகத்தில் மழைக்கு வாய்ப்பு இருப்பதாகவும் வானிலை மையம் கூறியுள்ளது குறிப்பிடத்தக்கது.

English summary

The heat has been scorching Tamil Nadu for the past week. People are suffering due to the increasing heat day by day. Today too, the heat has been scorching in 13 places in Tamil Nadu. The temperature at Madurai airport alone was recorded at 106.16 degrees Celsius. However, light rain fell in a few places including Chennai and Kanchipuram this evening.