‛‛8 மாவட்டங்கள் குறி’’.. தமிழகத்தில் இன்று கொட்டப்போகும் கனமழை.. ஆரஞ்சு + மஞ்சள் ‛வார்னிங்’

சென்னை: தமிழகத்தில் இன்று மற்றும் நாளை என்று 2 நாட்களுக்கு 2 மாவட்டங்களுக்கு கன முதல் மிக கனமழைக்கான ‛ஆரஞ்ச் அலர்ட்', 6 மாவட்டங்களுக்கு கனமழைக்கான ‛மஞ்சள் அலர்ட்' எச்சரிக்கை விடுக்கப்பட்டுள்ளது.

தமிழகமே தென்மேற்கு பருவமழையை எதிர்நோக்கி காத்து கொண்டிருக்கிறது. கடந்த மார்ச், ஏப்ரல் மாதங்களில் வெளுத்தெடுத்த அதிகப்படியான வெயில் காரணமாக குளம், குட்டைகள் தண்ணீர் இன்றி வற்றி உள்ளன.

இதனால் தென்மேற்கு பருவமழையை எதிர்நோக்கி மக்கள் காத்துள்ளனர். இந்நிலையில் தான் கடந்த சில நாட்களாக தமிழகத்தின் பல்வேறு இடங்களில் வெயில் குறைந்து இதமான சூழல் நிலவி வருகிறது.

குறிப்பாக மேற்கு தொடர்ச்சி மலை மாவட்டங்களில் சாரல் மழையும், சில இடங்களில் கனமழையும் பெய்து வருகிறது. இந்நிலையில் தான் இன்றைய தினம் தமிழகத்தில் உள்ள 2 மாவட்டங்களுக்கு கன முதல் மிக கனமழைக்கான ‛ஆரஞ்ச் அலர்ட்' எச்சரிக்கையும், 6 மாவட்டங்களுக்கு ‛மஞ்சள் அலர்ட்' எச்சரிக்கையும் விடுக்கப்பட்டுள்ளது.

இதுதொடர்பாக சென்னை வானிலை ஆய்வு மையம் தெரிவித்துள்ளது. மேற்கு திசை காற்றின் மாறுபாடு காரணமாக தமிழகத்தில் இன்று முதல் ஜுன் 30ம் தேதி வரை ஒரு சில இடங்களிலும், புதுச்சேரி மற்றும் காரைக்கால் பகுதிகளிலும் இடி, மின்னலுடன் கூடிய மிதமான மழை பெய்ய வாய்ப்புள்ளது.

அதேவேளையில் இன்றும், நாளையும், நீலகிரி மற்றும் கோவை மாவட்ட மலைப்பகுதிகளில் ஓரிரு இடங்களில் மிக கனமழை பெய்ய வாய்ப்புள்ளது. இதனால் இந்த பகுதிகளுக்கு ‛ஆரஞ்சு' அலர்ட் எச்சரிக்கை விடுக்கப்பட்டுள்ளது. ஒரு இடத்துக்கு ஆரஞ்சு அலர்ட் விடுக்கப்படும் பட்சத்தில் அங்கு பலத்த காற்றுடன் கனமழை முதல் மிக கனமழை பெய்யும். அதாவது மழையின் அளவை பொறுத்தமட்டில் 24 மணிநேரத்தில் குறைந்தபட்சமாக 115.6 மில்லி மீட்டர் முதல் 204.4 மில்லி மீட்டர் அளவாக பதிவாகும்.

அதேபோல் திருப்பூர், தேனி, திண்டுக்கல், தென்காசி, திருநெல்வேலி ஆகிய மாவட்டங்களின் மலைப்பகுதிகளிலும், கன்னியாகுமரி மாவட்டத்தின் சில இடங்களிலும் கனமழை பெய்ய வாய்ப்புள்ளது. இதனால் இந்த 6 மாவட்டங்களுக்கும் கனமழைக்கான ‛மஞ்சள் அலர்ட' விடுக்கப்பட்டுள்ளது'' என தெரிவிக்கப்பட்டுள்ளது. மஞ்சள் அலர்ட் விடுக்கப்பட்டதால் 24 மணிநேரத்தில் குறைந்தபட்சம் 64.5 மில்லி மீட்டர் முதல் 115.5 மில்லிமீட்டர் வரை மழை பதிவாகும்.

English summary

In Tamil Nadu, 'Orange Alert' for heavy to very heavy rain has been issued for 2 districts today and tomorrow and 'Yellow Alert' for heavy rain has been issued for 6 districts.