காலத்துக்கும் நின்னு பேசும் மழை.. வெதர்மேன் எச்சரித்த அடுத்த 3 இடங்கள்! மக்களே அசால்டா இருக்காதீங்க

சென்னை: தென் மாவட்டங்களை தொடர்ந்து 3 பகுதிகளில் இன்று மழைக்கு வாய்ப்பு இருப்பதாக தமிழ்நாடு வெதர்மேன் பிரதீப் ஜான் தெரிவித்து இருக்கிறார்.

இதுகுறித்து சமூக வலைதள பக்கங்களில் அவர் பதிவிட்டு உள்ளதாவது, "தூத்துக்குடி, திருநெல்வேலியில் காலத்திற்கும் நின்று பேசும் வரலாற்று சிறப்புமிக்க மழையை கொடுத்த காற்றழுத்த சுழற்சி அரபிக் கடலுக்கு சென்றுவிட்டது. 2 நாட்களில் அது மறைந்துவிடும். தற்போது மீட்பு மற்றும் நிவாரண பணிகள் முக்கியத்துவம் பெறுகின்றன. வேதாரண்யம், கோடியக்கரை, ராமேஸ்வரம் ஆகிய பகுதிகளில் இன்று மழைக்கு வாய்ப்பு உள்ளது. சென்னையில் வறண்ட வானிலையே தொடரும்." என்றார்.

முன்னதாக சென்னை வானிலை ஆய்வு மையம் வெளியிட்ட 3 மணி நேர அலர்டில், "இன்று காலை 10 மணிக்குள் புதுக்கோட்டை, தஞ்சாவூர், திருவாரூர், நாகப்பட்டினம், மயிலாடுதுறை, ராமநாதபுரம், மற்றும் சிவகங்கை மாவட்டங்களில் இடி மின்னலுடன் கூடிய மழைக்கு வாய்ப்பு உள்ளது. தேனி, தென்காசி, கன்னியாகுமரி, நெல்லை, தூத்துக்குடி மற்றும் விருதுநகரில் மிதமான மழை பெய்ய வாய்ப்புகள் உள்ளன. மழையால் சில இடங்களில் தண்ணீர் தேங்கலாம். சாலைகள் வழுக்கும் தன்மையும் இருக்கும். சில இடங்களில் போக்குவரத்து நெரிசல் ஏற்படலாம். பழுதான கட்டிடங்கள் சேதம் அடைவதற்கான வாய்ப்பு உள்ளது." என்று எச்சரிக்கப்பட்டு இருக்கிறது.

முன்னதாக வானிலை மையம் விடுத்த அறிக்கையில், "குமரிக்கடல் மற்றும் அதனை ஒட்டிய பகுதிகளில் ஒரு வளி மண்டல சுழற்சி நிலவுகிறது. இன்று தென் தமிழகத்தில் ஒரு சில இடங்களிலும், வட தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும். கன்னியாகுமரி, திருநெல்வேலி, தூத்துக்குடி மற்றும் தென்காசி மாவட்டங்களில் ஓரிரு இடங்களில் கனமழை பெய்யவாய்ப்புள்ளது.

20.12.2023 முதல் 24.12.2023 வரை: தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும்.

சென்னை மற்றும் புறநகர் பகுதிகளுக்கான வானிலை முன்னறிவிப்பு: அடுத்த 24 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான/மிதமான மழை பெய்யக்கூடும். அதிகபட்ச வெப்பநிலை 30 டிகிரி செல்சியஸ் மற்றும் குறைந்தபட்ச வெப்பநிலை 24-25 டிகிரி செல்சியஸை ஒட்டியும் இருக்கக்கூடும்.

அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான/மிதமான மழை பெய்யக்கூடும். அதிகபட்ச வெப்பநிலை 30-31 டிகிரி செல்சியஸ் மற்றும் குறைந்தபட்ச வெப்பநிலை 24-25 டிகிரி செல்சியஸை ஒட்டியும் இருக்கக்கூடும்." என்று குறிப்பிடப்பட்டு உள்ளது.

English summary

Tamil Nadu Weatherman Pradeep John has informed that there is a possibility of rain in 3 areas following southern districts.