பாரதி பக்கம்

சந்திரமதி

பச்சைக் குழந்தையடி - கண்ணிற்
பாவையடி சந்திரமதி!
இச்சைக் கினிய மது - என்றன்
இருவிழிக்குத்தே நிலவு
நச்சுத்தலைப் பாம்புக் குள்ளே - நல்ல
நாகமணி யுள்ள தென்பார்!
துச்சப்படு நெஞ்சிலே - நின்றன்
சோதி வளரு தடீ! (1)

பேச்சுக் கிடமே தடி! - நீ
பெண்குலத்தின் வெற்றி யடி!
ஆச்சர்ய மாயையடி! - என்றன்
ஆசைக் குமரி யடி!
நீச்சு நிலை கடந்த - வெள்ள
நீருக் குள்ளே வீழ்ந்தவர் போல்,
தீச்சுடரை வென்ற வொளி - கொண்ட
தேவி! நினை விழந்தே னடி! (2)

நீலக் கடலினிலே - நின்றன்
நீண்ட குழல் தோன்று தடி!
கோல மதியினிலே -நின்றன்
குளிர்ந்த முகங் காணு தடி!
ஞால வெளியினிலே - நின்றன்
ஞான வொளி வீசுதடி!
கால நடையினிலே - நின்றன்
காதல் விளங்குதடி! (பச்சைக் குழந்தையடி) (3)