பாரதி பக்கம்

மே 09, 2001

ஒளிக்கும் வெம்மைக்கும் எவ்வகை உறவு?வெம்மை யேற ஒளி தோன்றும்

வெம்மையைத் தொழுகின்றோம்.

வெம்மை ஒளியின் தாய், ஒளியின் முன்னுருவம்,

வெம்மையே, நீ தீ.

தீ தான் வீரத் தெய்வம்

தீ தான் ஞாயிறு,

தீயின் இயல்பே ஒளி,

தீ எரிக,

அதனிடத்தே நெய் பொழிகின்றோம்.

தீ எரிக.

அதனிடத்தே தசை பொழிகின்றோம்.

தீ எரிக.

அதனிடத்தே செந்நீர் பொழிகின்றோம்.

தீ எரிக.

அதற்கு வேள்வி செய்கின்றோம்,

தீ எரிக.

அறத்தீ, அறிவுத்தீ, உயிர்த்தீ,

விரதத்தீ, வேள்வித்தீ,

சின்த்தீ, பகைமைத்தீ, கொடுமைத்தீ-

இவையனைத்தையும் தொழுகின்றோம்.

இவற்றைக் காக்கின்றோம்,

இவற்றை ஆளுகின்றோம்.

தீயே, நீ எமது உயரின் தோழன்,

உன்னை வாழ்த்துகின்றோம்.

நின்னைப்போல, எம துயிர் நூறாண்டு வெம்மையும்

சுடரும் தருக.

தீயே நின்னைப்போல, எமதுள்ளம் சுடர்விடுக.

தியே. நின்னைப்போல. எம தறிவு கனலுக.

ஞாயிற்றினடத்தே,. தியே, நின்னைத்தான் போற்றுகின்றோம்.

ஞாயிற்றுத் தெய்வமே நின்னைப் புகழ்கின்றோம்.

நினதொளி நன்று, நின் செயல் நன்று, நீ நன்று.