பாரதி பக்கம்

ஜுலை 16, 2001

ஜய பேரிகை கொட்டடா ! - கொட்டடா

ஜய பேரிகை கொட்டடா !

பயமெனும் பேய்தனை யடித்தோம் --- பொய்மைப்

பாம்பைப் பிளந்துயிரைக் குடித்தோம் ;

வியனுல கனைத்தையும் அமுதென நுகரும்

வேக வாழ்வினைக் கைப் பிடித்தோம்( ஜய பேரிகை)

இரவியினொளியிடைக் குளித்தோம் - ஒளி

இன்னமு தினையுண்டு களித்தோம் ;

கரவினில் வந்துயிர்க் குலத்தினை யழிக்கும்

காலன் நடுநடுங்க விழித்தோம்.( ஜய பேரிகை)

காக்கை குருவி எங்கள் ஜாதி - நீள்

கடலும் மலையும் எங்கள் கூட்டம்;

நோக்கு திசையெலாம் நாமன்றி வேறில்லை;

நோக்க நோக்கக் களியாட்டம். ( ஜய பேரிகை)