பாரதிராஜாவுக்கு அபுதாபியில் பட்டம்

இயக்குநர் இமயம் பாரதிராஜாவுக்கு அபுதாபியில் 'திரையுலக சிற்பி' என்ற பட்டம் வழங்கப்பட்டது.

நேற்று (28ம் தேதி) ஐக்கிய அரபு அமீரகத் தலைநகர் அபுதாபியில் உள்ள இந்தியன் பள்ளிக்கூடத்தில் பாரதி அமைப்பினர் ஏற்பாடு செய்த விழாவில், யு.ஏ.இ. எக்சேஞ்ச் இயக்குநர் பி.ஆர்.செட்டி கலந்து கொண்டு இயக்குநர் பாரதிராஜாவுக்கு 'திரையுலக சிற்பி்' என்னும் பட்டத்தை வழங்கினார்.

இந்நிகழ்ச்சியில் தமிழகத்திலிருந்து வழக்கறிஞர் ராமலிங்கம், பேராசிரியை பர்வீன் சுல்தானா, மணிகண்டன், மு.க.சங்கரன், மோகன சுந்தரம் ஆகியோர் சிறப்பு விருந்தினர்களாக கலந்து கொண்டனர்.

பி.ஆர்.செட்டி பேசுகையில், 20 வருடங்களுக்கு முன்பு தான் சென்னை செல்லும் போது விமானத்தில் வைத்து இயக்குனர் பாரதிராஜா தன்னை படத்தில் நடிக்கக் அழைத்ததை நினைவு கூர்ந்தார்.

இயக்குனர் பாரதிராஜா பேசுகையில், அபுதாபி இந்திய மக்களின் தியாக உணர்வும், தமிழுக்கு தரும் மரியாதையும் தனக்கு பெரும் மகிழ்ச்சியை அளிப்பதாகக் கூறினார்.

விழாவில் 'சுழலும் சொல்லரங்கம் என்ற நிகழ்ச்சியும் நடைபெற்றது.