இந்திரா நூயிக்கு விருது

பெப்சிகோ நிறுவனத்தின் தலைவரான, சென்னையில் பிறந்த இந்திரா நூயிக்கு, பீட்ட்டர்சன் பிசினஸ் விருது கிடைத்துள்ளது.

இந்த விருதைப் பெறும் முதல் பெண்மணி இந்திரா என்பது குறிப்பிடத்தக்கது. சிறந்த வர்த்தகத் தலைமைத்துவம் கொண்டவர்களுக்கு இந்த விருது வழங்கப்படுகிறது.

அமெரிக்காவின் க்ரீன்வீச் நகரில் நடந்த நிகழ்ச்சியில் இந்த விருதினை இந்திரா நூயி பெற்றுக் கொண்டார். விழாவில் உலகம் முழுவதிலும் இருந்து வந்திருந்த பல்வேறு வர்த்தகத் தலைவர்கள், பிரதிநிதிகள் கலந்து கொண்டனர்.

ஏல் பல்கலைக்கழக தலைவர் ரிச்சர்ட் லெவின் இந்திரா நூயிக்கு விருதினை வழங்கினார். இந்திரா நூயி, ஏல் பல்கலைக்கழகத்தில்தான் நிர்வாகவியல் தொடர்பான மேல் படிப்பைப் படித்தார் என்பது குறிப்பிடத்தக்கது.

க்ரீன்விச்சில் உள்ள க்ரீன்வீச் நூலகம் சார்பில் பீட்டர்சன் விருது வழங்கப்படுகிறது. இந்த நூலகத்திற்கு கிளமென்டைன் லாக்வுட் பீட்டர்சன் என்பவர், கடந்த 1992ம் ஆண்டு 1 பில்லியன் ரூபாய் நிதியை நன்கொடையாக வழங்கினார். அந்தத் தொகையிலிருந்துதான் இந்த பீட்டர்சன் விருது உருவாக்கப்பட்டு வழங்கப்பட்டு வருகிறது.

இதுவரை 5 பேருக்கு இந்த விருது வழங்கப்பட்டுள்ளது. 6வது நபராக இந்திரா நூயி இவ்விருதினைப் பெற்றுள்ளார்.

சமீபத்தில் போர்ப்ஸ் இதழ் வெளியிட்ட உலகின் 10 சிறந்த பெண் நிர்வாகிகளில் இந்திராவும் இடம் பெற்றிருந்தார் என்பது நினைவிருக்கலாம்.