செம்மொழி தமிழுக்கு அரசு பஸ்களில் 'தடை'...?

விழுப்புரம்: எங்கும் தமிழ் எதிலும் தமிழ் என்று உறுதியளித்து அதற்கு செம்மொழி அந்தஸ்தையும் பெற்றுள்ள முதல்வர் கருணாநிதியின் ஆட்சியில், அரசு பஸ்களில் எலக்ட்ரானிக் இயந்திரம் மூலம் வழங்கப்படும் பயணச் சீட்டுகள் ஆங்கிலத்தில் மட்டுமே வழங்கப்படுகின்றன.

ஆனால் இதே முறையில் பயணச் சீட்டுகள் வழங்கும் தனியார் பஸ்கள் அவற்றைத் தமிழில் அச்சடித்துத் தருகின்றன.

தற்போது தமிழக அரசு பஸ்கள் பலவற்றில் எலக்ட்ரானிக் இயந்திரம் மூலம் பயணச் சீட்டுகள் வழங்கப்படுகின்றன. இப் பயணச் சீட்டுகள் பெரும்பாலும் ஆங்கிலத்தில்தான் உள்ளன.

ஆனால் இதே எலக்ட்ரானிக் இயந்திரத்தை பயன்படுத்தும் பல தனியார் பஸ்களில் பயணச் சீட்டுகள் தமிழிலேயே வழங்கப்படுகின்றன.

இது குறித்து அரசு பஸ் நடத்துநர்கள் சிலரிடம் கேட்டபோது, பெங்களூரில் உள்ள ஒரு நிறுவனத்தில் இருந்து இந்த கருவி வாங்கப்படுவதாகவும், இதற்கான பயிற்சியை அந் நிறுவனத்தைச் சார்ந்தவர்களே நடத்துனர்களுக்குப் பயிற்சி அளிப்பதாகவும் கூறுகின்றனர்.

தங்களுக்கு ஆங்கிலத்தில் வழங்குவதற்குதான் பயிற்சி அளிக்கப்பட்டுள்ளது என்றும் அவர்கள் கூறுகின்றனர்.

இது போன்ற நிறுவனங்கள் மூலம் வாங்கப்படும் எலக்ட்ரானிக் இயந்திரத்தை பயன்படுத்தி கர்நாடகத்தில் உள்ள அரசு பஸ்களில் அவர்களின் தாய்மொழியான கன்னடத்தில் பயணச் சீட்டுகள் வழங்கப்படுவதாக பல்வேறு தமிழ் அமைப்புகள் கூறுகின்றன.

தமிழில் வழங்கப்படும் தனியார் பஸ் கண்டக்டர்களை கேட்டபோது, "தாங்கள் கோயம்புத்தூரில் விற்பனையாகும் இயந்திரத்தை பயன்படுத்துவதாக' கூறுகின்றனர்.

தனியார் பஸ்களில் தமிழில் பயணச் சீட்டுகள் வழங்கும்போது, அரசு பஸ்களில் ஆங்கிலத்தில் பயணச் சீட்டுகள் வழங்குவது சரியா?