கிரிஷ் கர்நாடுக்கு யுனெஸ்கோ கெளரவம்!

புகழ் பெற்ற நாடக கலைஞரும்,திரைப்பட கலைஞருமான கிரிஷ் கர்நாடுக்கு யுனெஸ்கோ சர்வதேச நாடகக் கழகத்தின் தூதர் பதவி அளிக்கப்பட்டுள்ளது.

70 வயதை நெருங்கிக் கொண்டுள்ள கிரிஷ் கர்நாட் மிகச் சிறந்த நாடக நடிகர். அவரது அடிப்படையும் அதுதான். சர்வதேச விருதுகள் பலவற்றைப் பெற்றுள்ள கர்நாட், மிகச் சிறந்த கலைஞர் என விமர்சகர்களால் பாராட்டப்பட்டவர்.

கடந்த 40 ஆண்டுகளில் அவரது பல நாடகங்கள் பல்வேறு இந்திய மொழிகளில் மொழி மாற்றம் செய்யப்பட்டுள்ளன.

ஏராளமான திரைப்படங்களில் நடித்துள்ள கர்நாட், தமிழில் காதலன், ஹே ராம், ரட்சகன், செல்லமே உள்ளிட்ட பல படங்களில் நடித்துள்ளார்.

1972ம் ஆண்டு சங்கீத நாடக அகாடமி விருதைப் பெற்ற கர்நாட், 1974ல் பத்மஸ்ரீ பட்டத்தையும், 1992ல் பத்மபூஷன் பட்டத்தையும், 1998ம் ஆண்டு ஞானபீட விருதினையும் பெற்றவர்.

இந்த நிலையில் தற்போது பாரீஸில் உள்ள யுனெஸ்கோ சர்வதேச நாடக கழகத்தின் தூதர் என்ற கெளரவம் அவருக்கு வழங்கப்பட்டுள்ளது.

கர்நாட் தவிர இங்கிலாந்து நாடக இயக்குநர் பீட்டர் புரூக், இத்தாலிய நாடக எழுத்தாளர் டேரியோ போ, பிரெஞ்சு நாடக கலைஞர் ஏரியான் நூச்கின், ஜெர்மனி நடன ஆசிரியர் பினா பாஸ்ச் ஆகியோருக்கும் இந்த கெளரவம் அளிக்கப்பட்டுள்ளது.