தாய் மொழியில் படித்தால் மன இறுக்கம் குறையும்-அண்ணாதுரை

நெய்வேலி: தாய் மொழியில் படித்தால் தான் மன இறுக்கம் குறையும் என்று சந்திராயன் திட்ட இயக்குனர் மயில்சாமி அண்ணாத்துரை தெரிவித்துள்ளார்.

நெய்வேலியில் இந்திய பொறியாளர் கழகம், பொறியாளர் அறிவியலாளர் கழகம், கோவை அரசு தொழில்நுட்பக் கல்லூரி முன்னாள் மாணவர்கள் சங்கம் சார்பில் கலந்தாய்வு நிகழ்ச்சி நடைபெற்றது. இதில் சந்திராயன் திட்ட இயக்குனர் விஞ்ஞானி மயில்சாமி அண்ணாத்துரை கலந்து கொண்டார்.

அப்போது அவர் பேசியதாவது:

இந்தியா 2020ல் வல்லரசாகும் என்று அணு விஞ்ஞானி டாக்டர் அப்துல் கலாம் கூறியுள்ளார். அவரது ஆசை அதற்கு முன்பே நிறைவேறும் என்பதற்கு சாட்சியாக சந்திராயன்-1 நிலவுக்கு எடுத்துச் செல்லப்பட்டு வெற்றி பெற்றுள்ளோம்.

எந்த நாடும் முதல் முயற்சியிலேயே வெற்றி பெற்றது இல்லை. ஆனால் இந்தியா அதன் முதல் முயற்சியிலேயே வெற்றி பெற்றுள்ளது.

பெட்ரோல், தங்கம் போன்றவை மட்டும் ஒரு நாட்டின் செல்வம் அல்ல. மனித வளமே நாட்டின் மிகப் பெரிய செல்வமாகும்.

குழந்தைகள் தான் நாட்டின் நம்பிக்கை நட்சத்திரங்கள். அவர்கள் விருப்பம் போல் விரும்பும் துறையில் படிக்க வையுங்கள்.

தாய் மொழியில் படித்தால் தான் மன இறுக்கம் குறையும். முதல் 5 ஆண்டுகள் குழந்தைகளை தமிழில் படிக்க வையுங்கள். அப்போது தான் அவர்களுக்கு உணர்தல் என்பது எளிதாக வரும் என்றார்.