கோவை, திருச்சி, தஞ்சையிலும் 'சங்கமம்'

சென்னை: 'சங்கமம்' விழா சென்னையில் ஜனவரி 10ம் தேதி தொடங்குகிறது என்று கவிஞர் கனிமொழி தெரிவித்தார்.

செய்தியாளர்களிடம் அவர் கூறுகையில்,

கலை, பண்பாட்டு நிகழ்வான சென்னை 'சங்கமம்' தென்னிந்தியாவின் மிகப்பெரும் திருவிழாவாக வளர்ந்து வருகிறது. பொங்கல் திருநாள் மற்றும் தமிழ் புத்தாண்டு சிறப்புக் கொண்டாட்டமாகவும் இது அமைகிறது.

இம்முறை 'சங்கமம்' நிகழ்ச்சிகள் நகரின் பல்வேறு பகுதிகளில் 17 இடங்களில் திறந்தவெளி அரங்குகளில் நடைபெறும்.

'சங்கமம்' தொடக்க விழா ஜனவரி 10-ம் தேதி மாலை சென்னை பல்கலைக்கழக நூற்றாண்டு விழா அரங்கில் நடைபெறும். முதல்வர் கருணாநிதி நிகழ்ச்சிகளை தொடங்கி வைக்கிறார்.

சென்னை மட்டுமின்றி கோவை, திருச்சி, தஞ்சை ஆகிய நகரங்களிலும் சங்கமம் நிகழ்ச்சிகளை நடத்தத் திட்டமிட்டுள்ளோம் என்றார் கனிமொழி.