உலகின் மோசமான விமான நிலையங்களின் பட்டியலில் மும்பை, டெல்லி, பெங்களூர்

டெல்லி: உலகின் ஐந்து மோசமான விமான நிலையங்களின் பட்டியலில் மும்பைக்கு முதலிடம் கிடைத்துள்ளது. மேலும் டெல்லி, பெங்களூர் ஆகிய விமான நிலையங்களும் இந்தப் பட்டியலில் இடம் பெற்றுள்ளன.

விமானங்கள் கால தாமதமாக வருவது, புறப்படுவது ஆகியவற்றை அடிப்படையாகக் கொண்டு இந்த மோசமான விமான நிலையங்கள் பட்டியலை போர்ப்ஸ் தயாரித்துள்ளது.

இப்பட்டியலில் மும்பை, சத்ரபதி சிவாஜி சர்வதேச விமான நிலையத்திற்கு முதலிடம் கிடைத்துள்ளது.

டெல்லி இந்திரா காந்தி விமான நிலையம் 2வது இடத்தையும், பெங்களூர் சர்வதேச விமான நிலையம் 4வது இடத்தையும் பிடித்துள்ளன.

மொராக்கோவின் முகம்மது சர்வதேச விமான நிலையத்திற்கு 3வது இடம் கிடைத்துள்ளது.

மும்பை விமான நிலையத்திற்கு வரும் 58 சதவீத விமானங்கள் குறைந்தது அரை மணி நேரமோ அல்லது அதற்கு கூடுதலான நேரமோ தாமதமாக வருவதாக குறிப்பிடப்பட்டுள்ளது.

டெல்லியில், 60 சதவீத விமானங்கள் கால தாமதமாகத்தான் வருகின்றனவாம்.

அதேசமயம், விமானங்கள் புறப்படுவதில் காலதமாதமாகும் முதல் 10 விமான நிலையங்களின் பட்டியலில் இந்தியா இடம் பெறவில்லை என்பது ஆறுதலானது.