சென்னை மராத்தான் - புனே ராணுவ வீரர் முதலிடம்

சென்னை: சென்னை மராத்தான் ஓட்டப் போட்டியில் புனேயைச் சேர்ந்த ராணுவ வீரர் முதலிடத்தைப் பிடித்தார்.

தமிழ்நாடு விளையாட்டு மேம்பாட்டு ஆணையம் சார்பில் மராத்தான் ஓட்டம் சென்னை மெரீனா கடற்கரையில் இன்று காலை நடந்தது.

முழு மராத்தான், பாதி மராத்தான், மினி மராத்தான் உள்பட மொத்தம் 9 பிரிவுகளாக போட்டி நடத்தப்பட்டது.

முழு மராத்தான் போட்டி்கான தூரம் 42.2 கிலோமீட்டர் தூரமாகும். பாதி மராத்தான் போட்டிக்கான தூரம் 21.1 கிலோமீட்டர் ஆகும். மினி மராத்தானின் தூரம் 10 கிலோ மீட்டர்.

கிட்டத்தட்ட 15 ஆயிரம் பேர் இதில் பங்கேற்றனர். காலை 6 மணிக்கு கடற்கரைச் சாலை அண்ணா சமாதி அருகே போட்டியை மாநில விளையாட்டுத்துறை அமைச்சர் டி.பி.எம். மைதீன் கான் தொடங்கி வைத்தார்.

செய்தி விளம்பரத்துறை அமைச்சர் பரிதி இளம்வழுதி, மாநகராட்சி மேயர் மா.சுப்ரமணியன், இளைஞர் நலன் மற்றும் விளையாட்டுத்துறை முதன்மைச் செயலாளர் கிறிஸ்துதாஸ் காந்தி, தகவல் தொழில்நுட்பத்துறை செயலாளர் டேவிதார், தமிழ்நாடு விளையாட்டு ஆணைய உறுப்பினர் செயலாளர் சுதீப் ஜெயின், மாநகர காவல்துறை ஆணையர் ராதாகிருஷ்ணன், முன்னாள் வீரர்கள், நடிகர் ஸ்ரீகாந்த் உள்ளிட்டோர் நிகழ்ச்சியில் கலந்து கொண்டனர்.

முழு மராத்தான் போட்டியில் புனேயைச் சேர்ந்த ராணுவ வீரர் முதலிடத்தைப் பிடித்தார். அவருக்கு ரூ. 5 லட்சம் பரிசாக அளிக்கப்பட்டது.